ShQO-da belgili sanattaǵy azamattar úshin jeńildik tarıfi bekitildi

ÓSKEMEN. KAZINFORM — ShQO prokýratýrasynyń aralasýymen ekologııalyq jaǵdaıǵa baılanysty belgili sanattaǵy azamattar úshin jeńildik tarıfi bekitildi. Bul týraly oblystyq prokýratýra málim etti.

— Samar aýdany prokýratýrasy turǵyn ÚKSh salasyndaǵy zańdylyqtyń saqtalýyn taldaý barysynda, jergilikti atqarýshy organmen Ekologııalyq kodeks talaptary buzylǵanyn anyqtady. Turmystyq qaldyqtardy jınaý, tasymaldaý, suryptaý jáne kómý tarıfin bekitý sharalary uzaq ýaqyt boıy qabyldanbaǵany anyqtaldy, — delingen habarlamada.

Qadaǵalaý organy aralasqanǵa deıin qoldanysta bolǵan kórsetkish 2013 jyly aýdandyq TKSh bólimimen óz betinshe bekitilgen bolatyn.

— Qadaǵalaý aktisi boıynsha bul zańbuzýshylyq joıylyp, aýdan máslıhatynyń sheshimimen tıisti kórsetkish bekitildi. Prokýratýranyń bastamasymen áleýmettik jaǵynan osal toptar qataryndaǵy azamattarǵa qosymsha áleýmettik qoldaý sharalaryn kórsetý maqsatynda joǵaryda kórsetilgen sheshimdi bekitý barysynda jeńildikterge quqyly azamattar sanatynyń tizbesi kózdeldi, — dep habarlady prokýratýradan.

Atap aıtqanda, eńbek ardagerlerine, múgedek balalardy tárbıelep otyrǵan otbasylarǵa, kópbalaly otbasylar men analarǵa, jetim balalarǵa jáne ata-anasynyń qamqorlyǵynsyz qalǵan, jıyrma toǵyz jasqa tolmaǵan, kámelet jasyna deıin ata-anasynan aıyrylǵan balalarǵa qatty turmystyq qaldyqtardy shyǵarý qyzmetine 50% jeńildik qarastyrylǵan. Jasyna baılanysty zeınetkerlerge, 2-top múgedekterine jáne t. b. 25% jeńildik berilgen, al Uly Otan soǵysynyń ardagerleri qaldyqtardy shyǵarý úshin tólem jasaýdan tolyqtaı bosatyldy.

2025 jyldyń 1 qańtarynan bastap bul jeńildikterdi 4 myńnan astam adam, ıaǵnı jergilikti halyqtyń 34 paıyzy paıdalana alady. Qazirgi tańda qaldyqtardy shyǵarý qyzmetin kórsetetin kásiporyn jeńildigi bar azamattardan qajetti qujattardy qabyldaý jumysyn bastap ketti.

Buǵan deıin habarlanǵandaı, Shyǵys Qazaqstanda 7 balasyna alıment tólemegen áıel sottaldy.