ShQO-da bastaýysh synyp oqýshylaryn tegin tamaqtandyrýǵa 1,7 mlrd teńge jumsalady
Búgin oblys ákimdiginde ótken jınalysta jańa oqý jylyna daıyndyq máselesi talqylandy.
ShQO bilim basqarmasynyń basshysy Innesa Chernyshevanyń aıtýynsha, óńirdegi bastaýysh synyp oqýshylaryn tegin tamaqtandyrý úshin 1,7 mlrd teńge bólinedi.
«Shyǵys Qazaqstan boıynsha jańa oqý jylynda 98 myńnan astam oqýshy bilim almaq. Qazir 11 mektep salynýda. 77 mektepke kúrdeli jáne aǵymdaǵy jóndeý júrgizilip jatyr. 39 mektepte jylytý júıesi jóndeýden ótýde. Oblysta erekshe bilim berýdi qajet etetin 10 896 oqýshy bar», - dedi ol.
ShQO ákimi Ermek Kósherbaev Astanadaǵy qaıǵyly jaǵdaıǵa baılanysty ákimderge mektepterdegi oıyn alańdaryn muqııat tekserip, toqsan saıyn qadaǵalaý qajettigin jetkizdi.
«Mekteptegi jóndeý jumystarymen aınalysyp jatqan ózge oblystardan kelgen merdigerlerdiń jumystaryna qatysty syn kóp aıtylýda. Bizdiń aımaqta da bul jumysty oıdaǵydaı atqara alatyn kompanııalar jetkilikti. Sondaı-aq bilim ordalarynyń sport ınventari jáne basqa da jabdyqtarmen qamtylýyn tekserip, ashanalar jumysyn baqylaý qajet. Rıdderdegi máseleni de erekshe nazarda ustaýǵa tıispiz», – dedi ákim.
Eske salsaq, osyǵan deıin Rıdderdegi qazaq tildi «Shańyraq» gımnazııasynyń ata-analary mekteptiń apatty jaǵdaıda turǵanyn aıtyp, jańa bilim ordasyn suraǵan bolatyn.
