ShQO-da basqarma basshysy 134 mln teńge para alǵan - UQK
ASTANA. KAZINFORM – Ulttyq qaýipsizdik komıteti sybaılas jemqorlyq qylmystaryn anyqtaý jáne jolyn kesý boıynsha jumysty jalǵastyryp jatyr.
UQK málimetinshe, qazirgi ýaqytta Shyǵys Qazaqstan oblysynyń Jolaýshylar kóligi jáne avtomobıl joldary basqarmasynyń basshysy para alý jáne laýazymdyq ókilettikterin teris paıdalaný faktileri boıynsha kúdikpen ustaldy.
- Tergeý barysynda onyń jol qurylys kompanııalary men avtobýs parkteriniń ókilderinen jalpy somasy 134 mln teńge kóleminde zańsyz syıaqy alǵany anyqtaldy. Tintý júrgizý kezinde kúdiktiniń turǵyn úıinen 121,9 mln teńge jáne 97,7 myń AQSh dollary tárkilendi, - dep jazdy vedomstvodan.
Sonymen qatar osy óńirdegi bilim salasynda sapany qamtamasyz etý departamentiniń basshysyna qatysty qylmystyq is qozǵaldy. Ol muǵalimderdiń memlekettik attestattaýdan ótýine járdemdeskeni úshin júıeli túrde aqshalaı qarajat alyp otyrǵan degen kúdikke ilindi.
Sot sanktsııasymen atalǵan tulǵalar qamaýǵa alyndy. Qylmystyq-protsestik kodekstiń 201-babyna sáıkes ózge aqparat jarııa etilmeıdi.
Aıta keteıik, ShQO-da kásipkerlerge 140-qa jýyq zańsyz tekserý júrgizilgen.