ShQO-da basqarma aýrýhana ishiniń sýyqtyǵyna qatysty taraǵan vıdeoǵa túsinikteme berdi
ÓSKEMEN. KAZINFORM – Shyǵys Qazaqstan oblysy Shemonaıha aýdanyndaǵy aýrýhana ishiniń sýyqtyǵyna qatysty taraǵan vıdeoǵa Densaýlyq saqtaý basqarmasy túsinikteme berdi.
Áleýmettik jelide jáne BAQ-ta taraǵan vıdeo avtory Shemonaıha aýdanyndaǵy aýrýhanaǵa eki aılyq sábıimen túskenin aıtqan. Óz sózinde ol aýrýhana ishiniń múshkil jaǵdaıyn, qabyǵalarynyń opyrylyp turǵanyn, ájethanasynyń sýyqtyǵyn jetkizdi.
Osyǵan baılanysty Kazinform tilshisi ShQO Densaýlyq saqtaý basqarmasyna habarlasty.
- Bul vıdeo jylytý maýsymy bastalmaı turyp túsirilgen. Al qazirgi ýaqytta Shemonaıha aýdandyq aýrýhanasy ortalyqtandyrylǵan jylý júıesine qosyldy. Mekemege jylý turaqty jáne úzdiksiz berilip otyr. Palatalardaǵy temperatýra sanıtarlyq normalarǵa sáıkes keledi. Naqty aıtqanda, kórsetkish +20-21°C deńgeıinde. Bul málimetter kúndelikti monıtorıng nátıjesimen rastalady, - dep jaýap berdi basqarmanyń baspasóz qyzmetinen.
Sonymen qatar ótken jyly aýrýhananyń balalar bólimine aǵymdaǵy jóndeý júrgizilgendigi aıtyldy. Degenmen, ǵımarattyń ózi 1970-jyldary salynǵandyqtan kúrdeli jóndeýdi qajet etedi.
- Osyǵan baılanysty aýdannyń densaýlyq saqtaý ınfraqurylymyn jaqsartýǵa baǵyttalǵan jumystar júrgizilmek. 2026 jyly juqpaly aýrýlar bólimshesiniń ǵımaratyn qaıta jańartý jáne jańa dárigerlik ambýlatorııa salý josparlanǵan. Aýdandyq aýrýhananyń negizgi korpýsyn rekonstrýktsııalaý jobasy qazirgi ýaqytta QR Densaýlyq saqtaý mınıstrligimen kelisý kezeńinde, - delingen habarlamada.
Eske salsaq, osyǵan deıin Óskemende JRVI juqtyrǵandar kóbeıip, aýrýhanalarda shekteý sharalary engizilgeni habarlanǵan.