ShQO-da balyqshy sýǵa ketti
ÓSKEMEN. QazAqparat - Kúrshim aýdanynyń Alǵabas aýylynda balyq aýlaýǵa shyqqan kólik muz astyna ketip, bir adam kóz jumdy, dep habarlaıdy QazAqparat tilshisi.
«Alǵabas aýylynan 4 shaqyrym jerde «Nissan Almera» kóligi muz astyna ketti. Óskemennen balyq aýlaýǵa kelgen úsh adam mańaıdy tolyq zerttemesten muz betine shyqqan» - delingen oblystyq tótenshe jaǵdaılar departamentiniń baspasóz qyzmeti taratqan aqparatta. Sýǵa batqan kóliktiń ishinde bir adam qalyp qoıǵan. Qutqarýshylardy aman qalǵan eki joldasy telefonmen shaqyrypty.
«1966 jylǵy eki er adam batqan kólikten óz kúshterimen shyǵyp úlgergen. Kún keshkirip ketken kez bolatyn. Sý astynda qalǵan adamdy erteńinde izdeýge týra keldi. Al aman qalǵan eki balyqshyny jergilikti jedel járdem qyzmetine tapsyrdyq. Kelesi kúni súńgýirler 68 jastaǵy marqumnyń denesin 3 metr tereńdikten alyp shyqty» - deıdi Shyǵys óńirlik aeroutqyr jedel-qutqarý jasaǵynyń bólim jetekshisi Talǵat Nurjanov.
Qaıǵyly oqıǵa bolǵan aýmaqta muzdyń qalyńdyǵy 20 santımetr ǵana bolǵan. Onyń ústine muzdyń betinen qyzylsý júrgen. Bul júrgizýshiniń izden jańylýyna sebepker bolǵan.
Buǵan deıin Buqtyrma sý bógenine jeti kólik batqanyn habarlaǵanbyz.
Bul bıylǵy jyl úshin adam ólimine soqtyrǵan alǵashqy oqıǵa. Qutqarýshylar halyqtyń muzdan balyq aýlaý kezinde qaýipsizdik erejelerin saqtaı bermeıtinin aıtady.
«Muz betine shyqpas buryn áýeli mańaıdy tolyq zerttep alý qajet» - deıdi Talǵat Nurjanov.
