ShQO-da balyq aýlap otyrǵan zeınetker muz astyna ketti
ÓSKEMEN. QazAqparat - Shyǵys Qazaqstannyń Glýbokoe aýdanynda 71 jastaǵy qarııa muz astyna ketip, qaza tapty, dep habarlaıdy QazAqparat tilshisi.
Oqıǵa Verhberezovka aýylynda bolǵan. Ózenge qarmaǵyn súıretip jetken qarııany juqa muz kótermegen. Onyń denesi ózen jaǵasynan 10 metr jerden tabylǵan. Múrdeni birinshi aýdandyq ishki ister bóliminiń mamandary kórip, qutqarýshylardy shaqyrǵan.
«Muz áli qalyńdaı qoıǵan joq. Sondyqtan saqshylar ózdiginen áreket etpedi. Bizdiń jigitter máıitke úsh aıaqty satyny paıdalana otyryp jetti» - deıdi №26 órt sóndirý bólimi basshysynyń mindetin atqarýshy Rýslan Baıaýbaev.
Oblystyq tótenshe jaǵdaılar departamenti Shyǵys Qazaqstanda muz áli qalyńdaı qoımaǵandyqtan, balyq aýlaýǵa erte ekenin eskertedi.
Qazirgi tańda muz qalyńdyǵy - 3-5 sm aralyǵynda. Al adamdy kóterý úshin keminde 12 sm bolýy kerek. Departament mamandary muzdyń qalyń-juqalyǵyn túsine qarap ta anyqtaýǵa bolatynyn aıtady.
«Muzdyń túsi tunyq kógildir nemese jasyltym bolsa, berik degen sóz. Al aqshyltym muz budan eki ese juqa bolyp keledi. Surǵylt, sarǵysh tústi muz - eń qaýiptisi. Muz qanshalyqty berik bolsa da, bir orynda 10-15 mınýttan uzaq turýǵa bolmaıdy» - delingen baspasóz qyzmeti usynǵan málimette.
Aıaq astyndaǵy muz opyrylǵan jaǵdaıda tómendegi áreketter tıimdi sanalady:
-Muzdyń erneýine eki qolyńyzdy keńinen jaıý kerek.
-Qozǵalýǵa múmkindik bolsa, boıyńyzdy jylymnan aýlaq utsaý qajet. Iirim muz astyna jutyp áketýi múmkin.
-Muz betine birinshi keýde, odan keıin eki aıaq bir-birlep shyǵýy kerek
-Jylymnan arqamen aýnap shyǵý tıimdi
-Muz betinde jer baýyrlap júrgen kezde eki aıaqtyń arasyn alshaq ustaǵan jón.
