ShQO-da balyq aýlaıtyndarǵa qaýipsizdikti túsindirý úshin 460 reıd júrgizildi

Shyǵys Qazaqstan oblysynyń qutqarýshylary qys bastalǵaly muzda balyq aýlaıtyndarǵa qaýipsizdikti túsindirý úshin 460-tan astam reıd júrgizdi, dep habarlaıdy Kazinform.

ShQO Tótenshe jaǵdaılar departamenti baspasóz qyzmetiniń málimetine súıensek, aýa temperatýrasy qubylmaly bolǵanda muzǵa shyǵý qaýipti. Al keıbir áýesqoı balyqshylar tipti avtokólikpen tikeleı muz ústinde júredi. Osylaısha, qarapaıym qaýipsizdik sharalaryna nemquraıly qaraǵan olar óziniń jáne jolaýshylardyń ómirine qaýip tóndiredi.

«Qys bastalǵaly beri qutqarýshylar sý aıdyndarynda 460-tan astam reıd júrgizdi. Sondaı-aq 164 nusqaýlyq, 19 jıyn ótkizip, onda balyqshylarǵa muzda júrý erejelerin túsindirip, jadynamalar taratty. QR ÁKBtK-niń 412-babyn buzǵany úshin 1 balyqshy ákimshilik jaýapkershilikke tartyldy», - delingen aqparatta.

Reıdter barysynda TJD qyzmetkerleri halyqqa bir-birine kómekke kele alý úshin eshbir jaǵdaıda balyq aýlaýǵa jalǵyz barmaý kerektigin eske saldy.

«Azamattardan muzdaǵy qaýipsizdik sharalaryn qatań saqtaýdy suraımyz. «Sý aıdyndaryndaǵy qaýipsizdik erejelerine» sáıkes qalyńdyǵy 25 sm kem muzǵa shyqqan kezde ózimen birge ysqyryq, qutqarý jıleti, dıametri keminde 11 mm arqan, uzyndyǵy keminde 2 metr taıaq jáne sý ótkizbeıtin pakette uıaly telefon bolýy qajet», - dep túsindirdi departament bastyǵynyń orynbasary Qýatbek Kenjebekuly.