ShQO-da balasyna durys qaramaǵan 61 ata-ana jaýapqa tartyldy
ÓSKEMEN. QazAqparat – Shyǵys Qazaqstan oblysynyń tártip saqshylary «Turmys» jedel aldyn alý sharasy barysynda 70-ke jýyq berekesiz otbasyny anyqtady, dep habarlaıdy QazAqparat.
ShQO polıtsııa departamenti baspasóz qyzmetiniń habarlaýynsha, 20 qańtar men 20 aqpan aralyǵynda ótkizilip jatqan jedel aldyn alý sharasynyń maqsaty – otbasyndaǵy quqyq buzýshylyqtardyń aldyn alý jáne turǵylyqty jeri boıynsha polıtsııa bóliminde tirkeýde turǵandardy tekserý.
Búginde polıtseıler turmystyq qarym-qatynasta zańsyzdyqqa jol bergen 320 adamdy ákimshilik jaýapkershilikke tartqan. Sondaı-aq 59 adam ishimdikke jáne esirtkige táýeldilikten májbúrli túrde emdeýge jiberilipti.
«Tekserý barysynda 69 berekesiz otbasy anyqtaldy. Kámelet jasyna tolmaǵan balasyna durys qaramaǵany úshin 61 adam jaýapqa tartylyp, 12 adam ata-ana quqyǵynan aıyryldy» delingen vedomstvo málimetinde.
