ShQO-da balasyna alıment tólemeı júrgen 50-den astam adam anyqtaldy

ÓSKEMEN. QazAqparat – Shyǵys Qazaqstan oblysynda balasyna alıment tólemeı júrgen 50-den astam adam anyqtaldy, dep habarlaıdy QazAqparat tilshisi.

ShQO Polıtsııa departamenti baspasóz qyzmetiniń málimetine súıensek, óńir boıynsha jyl basynan beri alıment tólemegeni úshin izdeýde bolǵan 50-den astam er adam tabyldy.

«Máselen, Kúrshim aýdandyq polıtsııa bólimine óziniń kámeletke tolmaǵan balasyna alıment tólemeı júrgen 31 jastaǵy azamatty izdestirý týraly jeke sot oryndaýshysynyń qaýlysy kelip tústi. Ákesiniń balasyna qaryzy shamamen 1 500 000 teńgege jetken. Іzdestirý is-sharalary barysynda kóshi-qon qyzmetiniń mamandary qysqa merzimde er adamnyń ornalasqan jerin anyqtady. Ol Qostanaı qalasynda júrgen», - dep habarlady vedomstvo ókilderi.

Aqshany óndirip alý úshin tıisti materıal jeke sot oryndaýshylarynyń óńirlik palatasyna jiberildi.