ShQO-da balasyna alıment tólemegen áıel sottaldy
ÓSKEMEN. QazAqparat – Shyǵys Qazaqstan oblysynda turatyn áıeldiń balasyna alıment tólemegeni úshin 1 jylǵa bas bostandyǵy shekteldi, dep habarlaıdy QazAqparat ShQO QAJ departamentiniń baspasóz qyzmetine silteme jasap.
Vedomstvo ókilderiniń habarlaýynsha, 2019 jyly áıelden kámeletke tolmaǵan qyzyn asyraý úshin aılyq jalaqysynyń ¼ bóligi kóleminde alıment óndirildi. Alaıda ol alımentti tólemeı qoıǵanyna qaramastan, sot oryndaýshylarynyń sot aktileri mindetti túrde oryndalýy kerektigi jónindegi eskertýlerin de elemeı júre bergen.
«Ol meniń balammen kezdesip júrdi, men oǵan qarsy bolmadym. Ekeýi 3 aıdaı birge júrdi de aıyrylysyp ketti. Arada biraz ýaqyt ótkende men qyzdyń náresteli bolǵanyn bildim. Ony maǵan kórshiler aıtty. Men birden perzenthanaǵa habarlasyp, mán-jaıdy surastyryp edim, olar bul oqıǵanyń ras ekenin aıtty. Men perzenthanaǵa baryp, nárestemen eki kún jatyp, ony úıge alyp kettim. Náresteniń týǵan anasy notarıýstyń aldynda perzentinen bas tartatynyn aıtty, al meniń balam onyń ákesi atandy. Qazir sábı 2,5-ǵa keldi. Ony balamyz ekeýmiz tárbıelep jatyrmyz. Al náresteniń anasy odan bas tartýyn óziniń jas ekenin jáne bala tárbıesimen aınalysa almaıtynymen túsindirdi»,-dedi jas jigittiń anasy.
Qylmystyq atqarý júıesi departamentiniń ókilderi balasynan bas tartqan ananyń 2020 jyldan beri probatsııa qyzmetinde esepte turatynyn, ózine júkelgen mindetterdi de sot úkimin de oryndamaıtynyn aıtty.
«Qazrgi tańda onyń bas bostandyǵyn shekteý jazasyn bas bostandyǵynan aıyrý jazasyna aýystyrý týraly materıal daıyndalyp jatyr»,-dep qosty Úlbi aýdanynyń aǵa ınspektory, Ádilet aǵa leıtenanty Araı Orazhanova.
