ShQO-da balalardyń gepatıtke shaldyǵýy. Jańa derekter ataldy
ÓSKEMEN. QazAqparat - Shyǵys Qazaqstan oblysynyń Densaýlyq saqtaý basqarmasy Úrjar aýdanynyń Sholpan aýylynda 49 balaǵa «A» vırýsty gepatıti juǵyp, bir balanyń qaıtys bolýyna qatysty aqparatty joqqa shyǵardy, dep habarlaıdy «QazAqparat» HAA tilshisi óńirdiń aqparattyq ortalyǵyna silteme jasap.
«Barlyǵy 46 bala tekserilip, sonyń 25-i tereńdetilgen dıagnostıkadan ótkizý úshin Úrjar aýdandyq aýrýhanasynyń juqpaly aýrýlar bólimine jatqyzyldy. Tek 12 balada dıagnoz rastaldy. Olardyń 11-i mektep oqýshysy, al bireýi úsh jasta. Bul - búgingi resmı statıstıka. 2017 jyldyń qyrkúıeginen beri aýrý túrli aılarda jekelegen faktiler retinde tirkelgen. Naýqastardyń barlyǵy bilikti medıtsınalyq kómek kórsetilip, jaǵdaıy jaqsarǵan soń aýrýhanadan shyǵaryldy», - dep málim etti basqarma basshysynyń orynbasary Raıfa Safıollınova.
Budan tys, naýqastarmen qarym-qatynasta bolǵan balalarǵa túgel ekpe jasalýda. Sholpan aýylynda 140 adam vaktsınatsııalandy. Juqpaly aýrýdyń barlyq oshaqtarynda, mektepte qorytyndy dezınfektsııalyq sharalar júrgizildi.
Raıfa Safıollınovanyń sózine qaraǵanda, balanyń qaıtys bolýyna basqa aýrý sebep bolǵan.
«Patalogoanatomııalyq saraptama jáne laboratorııalyq zertteýler balada «A» vırýsty gepatıttiń bolmaǵanyn kórsetti. Kishkentaı qyzdyń aýrýyna baýyrdyń ótkir nekrozy, sepsıs sebep bolǵan. Sondyqtan baýyrdyń ótkir jetispeýshiligi týyndaǵan. Bul aýrý «A» vırýsty gepatıtimen baılanysty emes», - dedi R. Safıollınova.
Basqarmadaǵylar búgingi tańda oblysta, sonyń ishinde Úrjar aýdanynda «A» vırýsty gepatıtinen qaıtys bolý jaǵdaılary tirkelmegenin aıtty.
