ShQO-da Balalardy ońaltý ortalyǵy ashyldy

Medıtsınalyq mekeme «Qamqorlyq» bastamalar forýmy aıasynda ashyldy. Búginde dál osyndaı ortalyqtar elimizdiń segiz óńirinde óz jumysyn bastaǵan. Ońaltý ortalyqtary bes myń balanyń aıaqqa turyp, emine shıpa tabýyna múmkindik beredi. Munda eń joǵary tehnologııalyq jabdyqtar men ońaltýdyń eń ozyq ádistemeleri paıdalanylady.

Ana men bala ortalyǵynyń nevropatolog dárigeri Azamat Raıymbekovtyń aıtýynsha, osy saladaǵy bilikti mamandardy daıarlaý - Qazaqstandaǵy ońaltýdy damytýdyń negizgi faktory. Dárigerdiń ózi bala kezinen tserebraldy sal aýrýymen aýyrǵandyqtan, eshkim bul jumystyń mańyzdylyǵyn dál ózi sııaqty túsinbeıtinin jetkizdi.

«Bala kezimde jyl saıyn ońaltý ortalyqtarynda emdelip júrgenimde dáriger bolýdy jáne bolashaqta ózim sııaqty balalardy emdeýdi maqsat ettim. Búgin osy maqsatqa jetip otyrmyn. Elimizdiń segiz óńirindegi ońaltý ortalyǵynda jumys isteý úshin daıarlyqtan ótken 220 mamannyń birimin. Bizdiń árqaısymyz úshin mamandyǵymyzǵa sáıkes sapaly úsh satyly oqytý baǵdarlamasy ázirlengen. Jyl boıy Astana medıtsına ýnıversıtetiniń jáne balalardy ońaltý ulttyq ortalyǵynyń ǵalymdary dárister oqyp, óz tájirıbelerimen bólisti. Endi jumys ornynda biliktilikti arttyrý jáne sheteldik tálimgerlerden sabaq alý josparlanýda. Biz eń úzdik medıtsınalyq tehnıkamen jabdyqtalǵan zamanaýı ońaltý ortalyqtarynyń ashylyp jatqanyna qýanyshtymyz», - dedi Azamat Raıymbekov.

Onyń aıtýynsha, ońaltý ortalyǵynyń ashylýy – bul medıtsına salasynyń damýyndaǵy tyń qadam ǵana emes, erekshe qajettilikteri bar balalardyń armandaryn oryndaý maqsatynda jasalǵan jańa múmkindik.

Aıta ketý kerek, óńirde erekshe balalarǵa kóp kóńil bólinýde. 2015 jyly ShQO ákimi Danıl Ahmetovtyń bastamasymen Óskemende múmkindigi shekteýli balalarǵa arnalǵan «Aq Nıet» oblystyq mektep-ınternaty ashylǵan bolatyn. Onda balalar qajetti medıtsınalyq protsedýralardan ótip, ınklıýzıvti bilim alýda.