ShQO-da balalardyń quqyǵyn qorǵaý úshin arnaıy Telegram-bot iske qosyldy
ÓSKEMEN. KAZINFORM – Shyǵys Qazaqstan oblysynyń prokýratýrasy balalardyń quqyǵyn qorǵaý úshin «Urpaq» jobasyn qolǵa alyp, arnaıy Telegram-botty iske qosty.
Óńir prokýratýrasy «Urpaq» jobasyna bastamashy bolyp otyr. Sonyń aıasynda Telegram messendjerinde «vko_urpaq_bot» atty bot jasalǵan. Balalar quqyǵynyń buzylýy týraly aqparatty jınaýǵa arnalǵan avtomattandyrylǵan júıe arqyly jedel den qoıylyp, ótinish berýshilerge shuǵyl kómek kórsetiledi.
«Bala tárbıesi jáne onyń negizgi quqyqtary men zańdy múddelerin qamtamasyz etý máselesi prokýratýranyń erekshe baqylaýynda. Búgingi tańda memleket balalarǵa qatysty zańsyz áreketter, sonyń ishinde zorlyq-zombylyq jáne býllıng úshin jaýapkershilikti kúsheıtý boıynsha mańyzdy sharalardy qabyldap jatyr. Mundaı faktilerdiń aldyn alý úshin prokýratýra jańa ádisterdi qoldanady. Telegram-bottyń fýnktsıonaldyǵy ártúrli formattaǵy (foto, aýdıo, beıne, Word) kelip túsken habarlamalardy óńdeýge múmkindik beredi», - dep habarlady ShQO prokýratýrasynyń baspasóz qyzmetinen.
Kez kelgen adam men bala shuǵyl kómek suraı alady nemese balalarǵa qaýip tóndiretin aqparatty (ashyq lıýkter, joldaǵy jaǵdaı, qańǵybas ıtter jáne t.b.) jibere alady.
«Telegram-bot qylmystyń aldyn alý alańy bolady dep senemiz. Ol úshin zorlyq-zombylyqtyń nemese balalar quqyǵynyń kez kelgen buzylýyna kýá bolǵan azamattardy bul týraly @vko_urpaq_bot chat-botyna habarlaýǵa shaqyramyz. Anonımdi túrde habarlasý múmkindigi de bar», - delingen aqparatta.
