ShQO-da balalardy býllıngten qorǵaý úshin arnaıy chat-bot iske qosyldy
ÓSKEMEN. KAZINFORM — Shyǵys Qazaqstan oblysynda balalardyń quqyǵyn qorǵaý úshin arnaıy chat-bot iske qosyldy.
Óńirde Telegram messendjerinde «URPAQ» chat-boty jumys istep tur. Bul joba balalardy býllıngten qorǵaýǵa, quqyq buzýshylyqtyń aldyn alýǵa jáne psıhologııalyq kómek kórsetýge baǵyttalǵan.
— Chat-botty qoldaný yńǵaıly bolý úshin siltemesi bar QR-kodtar (@VKO_URPAQ_BOT) mektepterde, memlekettik mekemelerde jáne halyq kóp jınalatyn oryndarda ornalastyrylǵan. Sonymen qatar ata-analar chatyna da jiberilgen. Belsendi túrde nasıhattaýdyń nátıjesinde qoldanýshylar sany 11 274-ke jetti, — dep habarlady oblys ákimdiginen.
Joba iske qosylǵannan beri chat-bot arqyly 178 habarlama qabyldandy:
• 36 — shuǵyl kómek suraý (SOS);
• 33 — býllıng (kemsitý, mazaqtaý) týraly shaǵymdar;
• 65 — psıhologpen sóılesýge suranys;
• 19 — zorlyq-zombylyq týraly derekter;
• 18 — bopsalaý faktileri;
• 7 — dinge qatysty suraqtar.
Chat-bottyń kómegimen eki býllıng oqıǵasynyń aldyn alýǵa jáne jasóspirimderge veıp satqan Telegram-arnany buǵattaýǵa múmkindik týdy.
Eske salsaq, buǵan deıin Jambyl oblysynda bas dáriger býllıng faktisin habarlamaǵany úshin jaýapqa tartylǵany habarlanǵan.