ShQO-da balalar lagerlerinde qaýipsizdik sharalary tekserilip jatyr

ÓSKEMEN. QazAqparat – Shyǵys Qazaqstan oblysynda esepke alynǵan balalar lagerlerinde qaýipsizdik sharalary tekserilip jatyr. Óńirlik aqparat ortalyǵynda ótken baspasóz máslıhatynda Tótenshe jaǵdaılar departamentiniń ókilderi jaz kezinde halyq qaýipsizdigi úshin atqarylatyn jumystar jaıly aıtyp berdi, dep habarlaıdy QazAqparat tilshisi.

«Oblys boıynsha balalarǵa arnalǵan 19 lager esepke alynǵan. Osy ýaqytqa deıin 14 lagerge tekserý júrgizildi. Lager basshylaryna obektilerde órt qaýipsizdigi talaptarynyń qatań saqtalýy qajettigi túsindirildi. Orman alqaptarynda nemese olarǵa tikeleı jaqyn ornalasqan balalardyń jazǵy demalys oryndarynyń aýmaǵy janǵysh qaldyqtardan, qoqystardan, qurǵaq shópterden tazartylýy kerek», - deıdi departamenttiń memlekettik órt baqylaý basqarmasy bastyǵynyń mindetin ýaqytsha atqarýshy Nurjan Ómirjanov.

ShQO TJD bastyǵy orynbasarynyń mindetin ýaqytsha atqarýshy Rýslan Orynbekov sý mańyndaǵy demalys bazalary ıeleriniń qaýipsizdik erejelerinen attamaýy kerektigin jetkizdi. ıAǵnı, halyqtyń ruqsat etilmegen jerlerde shomylýyna jol berilmeýi tıis.

«Ótken jyly shomylý maýsymynda Shyǵys Qazaqstan oblysynda 7 adam sýǵa batyp ketti. Barlyq jazataıym oqıǵa jabdyqtalmaǵan sý aıdyndarynda bolǵan. Departament qyzmetkerleri 14 adamdy qutqardy, onyń ishinde 2 bala bar. Oblys ákimdiginiń qaýlysymen bıyl shomylýǵa bolatyn 14 ýchaske bekitildi. Demalýshylardyń qaýipsizdigin qamtamasyz etý maqsatynda jaǵalaýlardy patrýldeý úshin Buqtyrma sý qoımasynda mobıldi jáne jyljymaly beketter jumys isteıdi. Sondaı-aq sý aıdyndarynda qutqarýshylar qaýipsizdikti baqylaıdy. Búginde bul maqsatta qosymsha 23 qutqarýshy oqytyldy», - deıdi ol.