ShQO-da balabaqsha tárbıeshisi týberkýlezge shaldyqqan
ÓSKEMEN. QazAqparat - Shyǵys Qazaqstannyń Zyrıan qalasyndaǵy balabaqsha tárbıeshisine dárigerler týberkýlez degen dıagnoz qoıdy.
«Ladýshkı» balabaqshasynyń ata-analaryna jergilikti dárigerler analız tapsyryp, Mantý synamasyn ótkizý kerektigin eskertip habarlasady. Tárbıeshiniń syrqaty týraly osy kezde kópshilikke belgili bolǵan, dep habarlaıdy QazAqparat tilshisi.
«Tárbıeshilerdiń birinen syrqat anyqtalǵany ras. Biraq týberkýlezdiń bul túri juqpaly emes. Pedagog ózge de mamandar sııaqty jyl saıyn tekseristen ótip kelgen. Buryn mundaı syrqatqa shaldyqpaǵan», - deıdi Zyrıan aýdandyq bilim, dene shynyqtyrý jáne sport bóliminiń basshysy Baqytgúl Qanafına.
Tárbıeshiniń týberkýlezdiń «jabyq» túrine shaldyqqanyn aýdandyq aýrýhananyń bas dárigeri Vladımır Korobkın de rastap otyr.
«Bizdegi jańa apparattar bul aýrýdy erte kezeńderinen-aq anyqtaı alady. Bul naýqasqa qatysty da solaı aıtýǵa bolady. Týberkýlezdiń jabyq túri. Balalarǵa syrqat juqpaǵanyn senimdi túrde aıta alamyn» - deıdi bas dáriger. Degenmen, sanıtarlyq talaptarǵa sáıkes, atalmysh tárbıeshimen baılanysta bolǵan bóbekterdiń barlyǵy tyńǵylyqty tekserýden ótkizilmek.
