ShQO-da bala tárbıesine nemquraıly qaraǵan 17 ata-ana esepke qoıyldy
ÓSKEMEN. KAZINFORM — Shyǵys Qazaqstan oblysynda úsh kún ishinde bala tárbıesine nemquraıly qaraǵan 17 ata-ana esepke qoıyldy.
ShQO polıtsııa departamenti baspasóz qyzmetiniń málimetine súıensek, tártip saqshylary óńir aýmaǵynda «Jasóspirim» jedel aldyn alý sharasyn júrgizdi.
— 3 kúnge sozylǵan reıdterge 500-den astam polıtseı qatysty. Profılaktıkalyq esepte turǵan otbasylar tekserilip, jastar kóp jınalatyn oryndar baqylaýǵa alyndy. Sonyń nátıjesinde 161 ákimshilik quqyq buzýshylyq anyqtaldy, — delingen aqparatta.
11 kámeletke tolmaǵan bala jáne bala tárbıesine nemquraıly qaraǵan 17 zańdy ókil profılaktıkalyq esepke qoıyldy. Qabyldanǵan sharalar aýyr zardaptardyń aldyn alýǵa jáne táýekel tobyndaǵy otbasylardaǵy jaǵdaıdy ýaqytyly túzetýge múmkindik berdi.
Sonymen qatar polıtsııa qyzmetkerleri óńirdegi mektepter men kolledjderde 150-den astam kezdesý men dáris ótkizdi. Jasóspirimderge zańnama normalary, jaýapkershilik máseleleri men jeke tańdaý jasaýdyń mańyzy túsindirildi.
Eske salsaq, osyǵan deıin Tarazda kólik basqarǵan jasóspirim polıtseılerden qashýǵa tyrysqany habarlanǵan.