ShQO-da bala ólimine ákelip soqqan jol apatyna kináli ınjener sottaldy
ÓSKEMEN. KAZINFORM — Shyǵys Qazaqstan oblysy Kúrshim aýdanynda bala ólimine ákelip soqqan jol apatyna kináli dep tanylǵan jol-qurylys uıymdarynyń biriniń 53 jastaǵy bas ınjenerine qatysty úkim shyqty.
Tergeý barysynda polıtsııa qyzmetkerlerine jol ústindegi úıilgen topyraqtyń kólik qozǵalysyna qaýip tóndirgeni belgili boldy. Alaıda ınjener «Jol júrisi týraly» QR Zańynyń talaptaryna qaramastan, eskertý jol belgileriniń ornatylýyn qamtamasyz etpegen.
— Osy salǵyrttyqtyń saldarynan «Kúrshim-Qaljyr-Aqsýat» tasjolynyń 37-shaqyrymynda aýdannyń 37 jastaǵy turǵyny aıdap kele jatqan kólik jol ústindegi úıilgen topyraqqa soǵylǵan. Jol-kólik oqıǵasynyń saldarynan onyń 2019 jyly týǵan uly sol jerde kóz jumǵan. Al 2017 jyly týǵan qyzy jaraqat alǵan, — dep habarlady ShQO polıtsııa departamentinen.
Qylmystyq isti tergeý shamamen úsh aıǵa sozylǵan. 2026 jyldyń qańtarynda is sotqa joldanyp, naýryz aıynda aıyptaý úkimi shyqty.
Sot ınjenerdi «Kólikte qoldanylatyn qaǵıdalardy buzý» babynyń úshinshi bóligi boıynsha kináli dep tanydy. Oǵan 1 jylǵa bas bostandyǵynan aıyrý jáne bir jyl merzimge jol qaýipsizdigin qamtamasyz etýge baılanysty laýazymdardy atqarý quqyǵynan aıyrý jazasy taǵaıyndaldy.
Eske salsaq, osyǵan deıin Pavlodar oblysynda birqatar baǵytta kólik qozǵalysyna shekteý qoıylǵany habarlanǵan.
