ShQO-da BAQ ókilderi arasynda fýtbol men voleıboldan týrnır ótti

ÓSKEMEN. QazAqparat – Shyǵys Qazaqstan oblysynda el Táýelsizdiginiń 30 jyldyǵyna jáne 28 maýsym – Buqaralyq aqparat quraldary qyzmetkerleriniń kúnine oraı jýrnalıster arasynda fýtbol men voleıboldan týrnır ótti, dep habarlaıdy QazAqparat tilshisi.

QR Jýrnalıster odaǵynyń Shyǵys Qazaqstan oblystyq fılıaly men ShQO Dene shynyqtyrý jáne sport basqarmasy uıymdastyrǵan dop dodasy 25-26 maýsym kúnderi ótti. Tartysqa toly bolǵan týrnırge óńirdegi túrli BAQ-tarda eńbek etip júrgen jýrnalıster qatysty.

«Osyndaı týrnır oblysta sońǵy jyldary uıymdastyrylmaı ketken edi. Basty maqsat – áriptesterdiń basyn qosyp, yntymaqtaryn arttyrý. Aldaǵy ýaqytta týrnırdiń aıasyn keńeıtip, basqa da sport túrlerin qosý oıymyzda bar. Uıymshyldyq tanytyp, jarysqa belsendi qatysqan barsha áriptesterge rahmet! Demeýshilik kórsetken óńir kásiporyndaryna da alǵys bildiremin», - dedi QR Jýrnalıster odaǵynyń ShQOF tóraǵasy Azamat Qasym.

Týrnır qorytyndysy boıynsha voleıboldan «Altai» telearnasynyń ujymy jeńimpaz atandy. Ekinshi oryndy Shyǵys Qazaqstan oblystyq «Meniń ólkem» gazeti ıelense, Semeıden kelgen «Alash» komandasy úzdik úshtikti túıindedi.

Al fýtboldan «Shyǵys Aqparat» JShS-nyń oıynshylary úzdik atandy. «Altai» telearnasy ekinshi orynǵa jaıǵassa, Kókpekti aýdanynyń quramasy úshinshi oryndy ıelendi.

Oryn alǵan komandalarǵa aqshalaı syılyqtar jáne barlyq qatysýshylarǵa estelik kádesyılar tabys etildi.