ShQO-da azyq-túlik, gaz baǵasynyń qymbattyǵyna qaıda shaǵymdanýǵa bolady
QR Básekelestikti qorǵaý jáne damytý agenttigi ShQO boıynsha departamentiniń málimetine súıensek, óńirde áleýmettik mańyzy bar azyq-túlik, suıytylǵan gaz, benzın men dızel otyny baǵasyna shaǵymdanýǵa bolatyn jedel jeli iske qosylǵan. Oǵan búginge deıin Óskemen, Semeı qalalary men birqatar aýdan turǵyndarynan 200-den astam qońyraý tústi.
«Azamattardyń kóbisi azyq-túlik ónimderi men kommýnaldyq qyzmetter baǵasynyń tym qymbattyǵyna narazylyq bildirdi. Al keıbireýler suıytylǵan gaz, benzın, dızel otynynyń shekti baǵasy týraly aqparat alǵysy keledi. Ár shaǵym boıynsha aqparat jergilikti atqarýshy organdarǵa joldanýda. Zań boıynsha áleýmettik mańyzdaǵy azyq-túliktiń quny óndirýshiniń satý baǵasynyń nemese kóterme jetkizýshiniń satyp alý baǵasynyń 15 paıyzynan aspaýy tıis», - dedi departament basshysynyń orynbasary Renat Nábıev.
Qalalarda, aýdan ortalyqtarynda jáne ortalyqtan 200 shaqyrymnan aspaıtyn jerde ornalasqan eldi mekenderde gazdyń shekti baǵasy – 60 teńge. Eger aýyldyń qashyqtyǵy ortalyqtan 200 shaqyrym nemese odan da kóp bolsa, onda lıtrine 65 teńgege baǵalanady. Jazǵy jáne maýsymaralyq dızeldik otynnyń shekti baǵasy – 260 teńge. Benzınniń shekti baǵasy: AI-80 – lıtri 89 teńge, AI-92 – lıtri 182 teńge, AI-93 – lıtri 182 teńge, AI-95 – lıtri 215 teńge.
Shyǵys Qazaqstan oblysy boıynsha jedel jeli nómiri – 8-705-280-45-13.
