ShQO-da azyq-túlik baǵasyn turaqtandyrý úshin qandaı sharalar atqarylyp jatyr
ShQO kásipkerlik jáne ındýstrııalyq-ınnovatsııalyq damý basqarmasynyń basshysy Ernar Mustafınniń aıtýynsha, jyl basynan beri jemis-jıdek, kókónis, kúnbaǵys maıy, qant, sút ónimderi baǵasynyń óskeni baıqalady. Bul ótken jylǵy ónimniń azaıýyna, kommýnaldyq qyzmetter tarıfiniń, sondaı-aq Reseıden keletin janar-jaǵar maı men qaptama materıaldar baǵasynyń kóterilýine baılanysty bolyp otyr.
«Búginde «Ertis» ÁKK arqyly baǵanyń ósýin tejeý sharalary aıasynda sút, jumsaq qaptamadaǵy maılylyǵy 2,5% aıran jáne maılylyǵy 5,9% irimshik, kúnbaǵys maıy, qant, makaron, jumyrtqa jáne tuz baǵalaryn turaqtandyrý úshin «All Mart Vostok» JShS, «ÝKMZ» jáne «Krýpnoff» kásiporyndaryna 200 mln teńgeden qaryz berildi. Sonymen qatar 500 mln teńge qaryz kartop, sábiz, pııaz, qyryqqabat baǵalaryn turaqtandyrý úshin «Agrofırma prırechnoe» JShS-na berilgen. Bul jumystar 2021 jyldyń qarasha aıynan bastap 2022 jyldyń mamyr aıyna deıin iske asyrylatyn bolady», - dedi Ernar Mustafın.
Sonymen qatar qalalar men aýdandardyń ákimdikteri 160 fermermen jáne kóterme saýda kásipkerlerimen, 2512 saýda nysanymen eń tómengi (7-10%) saýda ústemesin qoldaný týraly memorandým jasasty.
Budan bólek, 30 naýryzda ShQO-da on jumyrtqaǵa 405 teńge kóleminde shekti baǵa belgilengen.
Budan bólek, taýarlardyń jetispeýshiliginen baǵanyń ósýine jol bermes úshin óńirlik turaqtandyrý qoryna 2,2 myń tonna birinshi surypty bıdaı uny, 408 tonna kúrish, 204 tonna qaraqumyq jarmasy, 2,4 myń tonna kartop, 1,3 myń tonna qyryqqabat, 800 tonna sábiz jáne 1,2 myń tonna pııaz satyp alyndy.
