ShQO-da azyq-túlik baǵasyn ósirgen kásipkerlerge qatysty 81 is qozǵaldy
ÓSKEMEN. KAZINFORM — Shyǵys Qazaqstan oblysynda jyl basynan beri áleýmettik azyq-túlik baǵasyn ósirgen kásipkerlerge qatysty 81 ákimshilik is qozǵaldy.
ShQO kásipkerlik jáne ónerkásip basqarmasynyń málimetine súıensek, búginde oblysta 46 áleýmettik saýda orny jumys isteıdi. Onyń 21-i — áleýmettik pavılon, 25-i — seriktes dúken. Aldaǵy kezeńde áleýmettik shaǵyn marketter ashý josparlanyp otyr.
— Áleýmettik mańyzy bar azyq-túlik baǵasynyń negizsiz ósýine jol bermeý maqsatynda turaqty monıtorıng júrgizilip keledi. Jyl basynan beri zań talaptaryn buzǵan kásipkerlerge qatysty 81 ákimshilik is qozǵalyp, jalpy somasy 1 mln teńgeden astam aıyppul salyndy. Búgingi tańda aımaq turǵyndary qant, kúnbaǵys maıy, qaraqumyq, kúrish, makaron ónimderi, tuz, kartop, sábiz, pııaz, qyryqqabat jáne sıyr etin qosa alǵanda, áleýmettik mańyzy bar 11 ónimdi qoljetimdi baǵamen satyp alyp jatyr, — deıdi basqarma basshysy Isataı Ańsat.
Óńirde aýyl sharýashylyǵy ónimderin tikeleı óndirýshiden tutynýshyǵa jetkizýge baǵyttalǵan jármeńkeler uıymdastyrylyp keledi. Bıyl 300-ge jýyq jármeńke ótip, turǵyndar jalpy somasy 1,4 mlrd teńgege jergilikti ónimderdi satyp alǵan.
Eske salaıyq, osyǵan deıin BQO-da 90-nan astam kásipkerdiń saýda baǵasyn asyryp satqany belgili bolǵany edi.
