ShQO-da azyq-túlik baǵasyn ósirgen 90 kásipker jaýapqa tartyldy
ÓSKEMEN. KAZINFORM – Shyǵys Qazaqstan oblysynda áleýmettik mańyzy bar azyq-túlik baǵasyn ósirgen 90 kásipker jaýapqa tartyldy.
ShQO saýda jáne tutynýshylardyń quqyqtaryn qorǵaý departamentiniń málimetine súıensek, osy jyldyń basynan beri óńirde QR Saýda qyzmetin retteý týraly zańdy buzǵany úshin 178 kásipker ákimshilik jaýapkershilikke tartylyp, jalpy somasy 2 mln teńgeden astam aıyppul tóledi.
- Mysaly, taýarlardy teńgemen emes, rýblmen baǵalap satqan dúken ıesine 393 200 teńge aıyppul salyndy. Sonymen qatar 84 kásipker taýarlardy baǵasyz satqany nemese kassadaǵy baǵa taýarda jazylǵan baǵadan joǵary bolǵany úshin jaýapqa tartyldy, - delingen aqparatta.
Áleýmettik mańyzy bar azyq-túlik taýarlaryna 15 paıyzdan asatyn ústemeaqy qosqany úshin 90 kásipkerge ákimshilik shara qabyldandy. Onyń 49-yna eskertý berilse, 41-i aıyppul tóleýge mindetteldi.
Osy rette, áleýmettik mańyzy bar azyq-túlik baǵasynyń negizsiz kóterilgenin baıqaǵan turǵyndar departamentke 8 (7232) 26-72-07 telefon nómiri arqyly júgine alady.
Eske salsaq, buǵan deıin 1 qańtardan bastap satýshylar men óndirýshiler ár taýarǵa 13 tańbaly kod engizýge mindetti ekendigi habarlanǵan.