ShQO-da azyq-túlik baǵasyn negizsiz kótergen 50-ge jýyq kásipker jaýapqa tartyldy
ÓSKEMEN. KAZINFORM - Shyǵys Qazaqstan oblysynda jyl basynan beri áleýmettik mańyzy bar azyq-túlik taýarlaryna shekti saýda ústemeaqysyn negizsiz ósirgen 49 kásipker ákimshilik jaýapkershilikke tartyldy.
ShQO kásipkerlik jáne ındýstrııalyq-ınnovatsııalyq damý basqarmasynyń málimetine súıensek, óńirde baǵa belgileý salasyndaǵy zańnama talaptarynyń saqtalýyna turaqty monıtorıng júrgizilip keledi.
– Zańnamaǵa sáıkes, áleýmettik mańyzy bar azyq-túlik taýarlaryna qoıylatyn shekti saýda ústemeaqysy óndirýshi baǵasynyń 15 paıyzynan aspaýǵa tıis. 2026 jyldyń basynan beri osy talaptardy buzý faktileri boıynsha 49 kásipker ákimshilik jaýapkershilikke tartyldy.
Salynǵan aıyppuldardyń jalpy somasy 1 mln teńgeden asty, – delingen habarlamada.
Áleýmettik mańyzy bar azyq-túlik taýarlarynyń tizbesine 19 taýar kiredi. Olardyń qatarynda nan, un, jarma, sút ónimderi, jumyrtqa, et, kókónis jáne kúndelikti tutynatyn ózge de azyq-túlik túrleri bar.
Atalǵan taýarlarǵa belgilenetin saýda ústemeaqysy baǵanyń negizsiz ósýine jol bermeý maqsatynda memleket tarapynan baqylaýda ustalady.
Eske salsaq, osyǵan deıin ShQO-da áleýmettik azyq-túlik baǵasyn negizsiz kótergen deldaldar anyqtalǵany habarlanǵan.
