ShQO-da aıyppulyn tólemegen 225 júrgizýshiniń kóligi arnaıy turaqqa qoıyldy
ÓSKEMEN. QazAqparat – Shyǵys Qazaqstan oblysynda aıyppulyn tólemegen 225 júrgizýshiniń kóligi arnaıy turaqqa qoıyldy, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, tártip saqshylary óńir aýmaǵynda «Boryshker» jedel aldyn alý sharasyn júrgizdi.
Úsh kún ishinde polıtseıler 29 mln teńgeden astam aıyppul óndirdi. Sondaı-aq 225 boryshkerdiń avtokóligi mamandandyrylǵan turaqqa qoıylǵan.
«Shara barysynda 1105 adam ákimshilik aıyppul boıynsha bereshegi bar ekendigi týraly habarlandy. Turǵyndar arasynda ákimshilik zańnama talaptary boıynsha túsindirý jumystary júrgizildi. Sot oryndaýshylarymen birlesip ótkizilgen reıd barysynda páterler men jer úılerdi aralap, aıyppuldy ýaqtyly tóleý qajettigi túsindirildi», - delingen aqparatta.
Máselen, Óskemen qalasynda 79 ret jol erejesin buzǵan júrgizýshi anyqtalǵan. Salynǵan aıyppuldyń jalpy somasy – 1 600 000 teńgeni quraıdy.
