ShQO-da aıyppul tólemegen 216 júrgizýshiniń kóligi turaqqa jetkizildi
ÓSKEMEN. QazAqparat – Shyǵys Qazaqstan oblysynda polıtsııa qyzmetkerleri 216 boryshkerdiń kóligin aıyp turaǵyna qoıdy, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, tártip saqshylary «Boryshker» jedel aldyn alý sharasy aıasynda memleket bıýdjetine 21 mıllıon teńgeden astam qarajat óndirdi.
«Tólenbegen aıyppuly bar 216 júrgizýshiniń avtokóligi mamandandyrylǵan turaqqa jetkizildi. Onyń ishinde 74-i Reseı Federatsııasynda, ekeýi Armenııada esepte turǵan kólik. Budan bólek, ákimshilik aıyppuldy tóleý tásilderi týraly túsindirý jumystary júrgizildi. Barlyǵy 1 myńnan astam júrgizýshi men 5 myńnan astam turǵyn úı qamtylǵan», - deıdi departament bastyǵy Saǵat Mádıev.
Máselen, shara barysynda jol erejesin únemi buzyp júrgen Glýbokoe aýdanynyń turǵyny anyqtaldy. Onyń jalpy somasy 100 myń teńgeden asatyn 15 aıyppuly bar bolyp shyqty. Júrgizýshiniń kóligi boryshyn tolyq ótegenge deıin arnaıy turaqqa qoıylǵan.
