«ShQO-da aıý shoshqaǵa shapty»: jelide taraǵan vıdeo feık bolyp shyqty
ÓSKEMEN. KAZINFORM — Shyǵys Qazaqstan oblysy Glýbokoe kenti turǵyndary arasynda kóshede shoshqanyń ushasyn súırep bara jatqan aıý beınelengen vıdeo tarap ketti. Belgili bolǵandaı, bul vıdeonyń kentke múlde qatysy joq.
Vıdeo óńirlik Telegram-arnalar men jergilikti chattarda kóp taralǵanymen, keıinnen óshirilgen. Áleýmettik jeli qoldanýshylary Glýbokoe kentinde aıý shabýyl jasady degen aqparat taratqan. Osydan keıin turǵyndar arasynda dúrbeleń týyp, túrli habarlamalar taraı bastaǵan.
Jergilikti turǵyn Irına Nemchenkonyń aıtýynsha, túsinispeýshilik eldi meken ataýynyń birdeı bolýynan týyndaýy múmkin. Shyǵys Qazaqstan oblysynda Glýbokoe kenti bar. Sonymen qatar dál osyndaı ataýmen Belarýs Respýblıkasynda da eldimeken bar. Buǵan deıin onda kóshede aıýdyń júrgeni tirkelgen.
— Adamdar vıdeony bir-birine jibere bastady. Biraq bul bizdiń Glýbokoe emes. Meniń omartam Glýbokoenyń eń shalǵaı bóliginde, Qúrshim degen jerde ornalasqan. Alaıda onda da ázirge aıý kórgen joqpyn, — deıdi turǵyn.
Orman jáne ańshylyq sharýashylyǵy jedel jasaǵynyń málimetinshe, Glýbokoe turǵyndarynan aıýdyń júrgeni týraly eshqandaı ótinish túspegen.
— Ázirge Glýbokoeden bizge eshqandaı ótinish túsken joq. Aqparat tekserilip jatyr. Degenmen, bul jalǵan aqparat bolýy múmkin, — deıdi mamandar.
Oblys ákimdiginde de taralǵan vıdeonyń Qazaqstanda túsirilmegenin rastady. Qolda bar aqparatqa sáıkes, kadrlar Reseı aýmaǵynda túsirilgen.
Osylaısha, ShQO-nyń Glýbokoe kentinde aıýdyń shoshqaǵa shapqany týraly taraǵan aqparat shyndyqqa janaspaıdy.
Eske salsaq, osyǵan deıin Marqakólde qustardy sanap júrgen mamandar aıýdy kezdestirgeni habarlanǵan.
