ShQO-da aıý aýyl turǵyndarynyń mazasyn qashyrdy

ÓSKEMEN. KAZINFORM — Shyǵys Qazaqstan oblysy Glýbokoe aýdanynyń turǵyndary aıýdyń aýyl irgesine kirip ketkenin aıtyp, dabyl qaqty. 

Glýbokoe aýdanyna qarasty Bobrovka aýylynyń halqy eldi meken shetine aıý kirip ketkenin jetkizdi. Bul «Nurtaý» demalys bazasynyń mańy. Túz taǵysy birneshe omartany búldirgen.

Osyǵan baılanysty «Orman jáne ańshylyq sharýashylyǵy» MM qyzmetkerleri sol jerge attandy.

— Búgin bizdiń qyzmetkerler oqıǵa ornyna jolǵa shyqty. Qosymsha málimet ınspektorlar oralǵannan keıin belgili bolady, — dep habarlady mekemeniń jedel áreket etý tobynyń baspasóz hatshysy Maqsat Shakırov.

Eske salsaq, osyǵan deıin Nıderlandynyń Ýtreht qalasynyń mańyndaǵy tabıǵı saıabaqta qasqyr alty jastaǵy balaǵa shabýyldaǵany habarlanǵan.