ShQO-da aıryqsha metaldyń mol qory anyqtaldy
ASTANA. QazAqparat -Sırek jáne sırek kezdesetin metaldardyń ishinde lıtıı zor suranysqa ıe bola bastaǵan. Geologtar oblysta bul baǵaly metaldyń mol qory bar ekenin zerttep, anyqtady, dep jazady altaynews.
Keıbir elder munaımen teńestirip jatqan kúmis tústes bul asa baǵaly, jeńil metall túri shyny jáne keramıka ónerkásibi salalaryna (31 %) kóp paıdalanylýda. Shyny óndirýde lıtııdi az mólsherde qosý qýat kózin tutynýdy 5-10% azaıtady. Elektromobıl óndirýge asa qajet lıtıı akkýmýlıator batareıalaryn shyǵarýǵa da keńinen qoldanylady, tutyný kólemi- 23%. Atalǵan metall qajetti qorytpalardy ázirleý kezinde metallýrgııa ónerkásibinde jıi qoldanylady. Sarapshylar aldaǵy ýaqytta lıtııge degen suranystyń arta bermek ekendigin aıtýda.
2015 jyly «Óńirlik, geologııalyq-túsirý, izdeý-baǵalaý jáne izdeý-barlaý jumystary» bıýdjettik baǵdarlamasy boıynsha respýblıkalyq bıýdjet qarajaty esebinen Joǵarǵy Espe sırek metall ýchaskesinde izdestirý-baǵalaý jumystary bastaldy. Ol Aıagóz aýdanynyń aýmaǵynda Aıagóz qalasynan soltústik shyǵysqa qaraı 88 shaqyrymda ornalasqan, jumystardy «Qazgeologııa» UGK» AQ júrgizip jatyr. Bul jaqta pırohlor, gagarınıt, torıt, tsırkon, ksenotım, monatsıt, gadolınıt, fenakıt mıneraldary bar ekendigi anyqtalǵan.
