ShQO-da áıelshe kıingen 45 jastaǵy erkek shaǵyn nesıe uıymyn tonap ketti
ÓSKEMEN. QazAqparat – Shyǵys Qazaqstan oblysy Rıdder qalasynda áıeldiń kıimin kıgen er adam shaǵyn nesıe uıymyn tonap ketti, dep habarlaıdy QazAqparat tilshisi.
ShQO polıtsııa departamenti baspasóz qyzmetiniń málimetine súıensek, 21 naýryzda saǵat 11.30-da Rıdder qalalyq polıtsııa bólimine habarlasqan shahar turǵyny mıkroqarjy uıymy keńsesiniń tonalǵanyn aıtqan.
Óz sózinde ol beıtanys áıel adamnyń iri kólemdegi aqshany jymqyrǵanyn jetkizdi.
«Oqıǵa ornyna tártip saqshylary dereý kelip jetti. Jedel-izdestirý sharalary barysynda krımınaldyq polıtsııa bólimshesiniń qyzmetkerlerine jábirlenýshiler men kýágerler biraýyzdan urynyń qyz ekenin alǵa tartty. Alaıda bir saǵattyń ishinde jedel ýákilder kúdikti er adamdy ustady. Bul - Rıdder qalasynyń 45 jastaǵy turǵyny bolyp shyqty» delingen habarlamada.
Anyqtalǵandaı, ol qaladaǵy bazarlardyń birinde ornalasqan paıyzsyz qaryz beretin mıkroqarjy uıymynyń keńsesine shabýyl jasaýdy kópten beri josparlap júrgen.
Áıelderge arnalǵan kapıýshony bar aq tústi kúrtkeni, óksheli aq etikti, uzyn parık pen qara sharf kıgen erkek bet-álpetin jasyratyn medıtsınalyq maska taǵyp aldy.
«Keńsege kirgen tonaýshy menedjerdi qarý tárizdi zatpen qorqytyp, iri kólemdegi qarajatty urlap ketken. Qazirgi ýaqytta atalǵan fakti boıynsha QR Qylmystyq Kodeksiniń 191-baby 2-bóligine sáıkes sotqa deıingi tergeý amaldary júrgizilýde» delingen aqparatta.
