ShQO-da áıel tanysynyń atynan 10-nan asa nesıe alǵan
NUR-SULTAN. QazAqparat -ShQO-nyń Aıagóz qalasynda 30 jastaǵy alaıaq áıel quryqtaldy. Ol óziniń tanysynyń atynan birneshe ret onlaın-nesıe alyp, qaryzǵa belshesinen batyryp ketken, dep habarlaıdy Altaınıýs.
Oqıǵa 2018 jyldyń naýryz aıynda bolǵan. Alaıaq áıel 44 jastaǵy qala turǵynynyń ishimdikke áýes ekenin bilip, ony aldap-arbap, senimine kiredi. Osylaısha, onyń jeke bas kýáligin fotosýretke túsirip, bank málimetterin bilip alady. Smartfonyna ınternet-bankıng ornatyp, túrli mıkronesıe beretin mekemelerden onnan astam onlaın-nesıe rásimdeıdi. Barlyǵy jarty mıllıondaı qaryz alǵany anyqtalyp otyr.
Sáýirdiń sońyna qaraı aldanǵan áıel moınynda 600 myń teńge qaryzy bar ekenin bilip, birden tanysynan kóredi. Ol nesıe alǵanyn moıyndap, qaryzdy óteýge ýáde etedi. Alaıda sol boıy ýádesin oryndamaǵan soń, jábirlenýshi polıtsııaǵa aryzdanǵan.
