ShQO-da aıazǵa qaramastan 37 jolaýshysy bar avtobýs jolǵa shyqqan
ÓSKEMEN. QazAqparat – Shyǵys Qazaqstan oblysynyń polıtsııa qyzmetkerleri aıazǵa qaramastan jolǵa shyqqan avtobýstan 37 adamdy evakýatsııalady, dep habarlaıdy QazAqparat tilshisi.
Óńirde aýa temperatýrasynyń kúrt tómendep ketkenine birneshe kún boldy. Qutqarýshylar men polıtseıler turǵyndarǵa alys saparǵa shyqpaýǵa keńes berýde. Alaıda buǵan qulaq aspaǵan qoǵamdyq kólik júrgizýshisi «Óskemen-Aıagóz» baǵytynda jolǵa shyǵyp ketken. Osylaısha, 5 qańtarda saǵat 19.30 shamasynda «Almaty-Óskemen» tasjolynyń 778-shaqyrymynda tártip saqshylary «Setra» markaly kólikti toqtatty.
«Avtobýs júrgizýshisiniń aıtýynsha, salonda 37 jolaýshy bolǵan. Olar oblystaǵy JShS-lardyń birinde vahtalyq ádispen jumys isteıtin azamattar. Qaıǵyly jaǵdaıdyń aldyn alý úshin polıtsııa qyzmetkerleri jolaýshylardy evakýatsııalap, Aıagózdegi qonaqúılerdiń birine ornalastyrdy», - dep habarlady ShQO Polıtsııa departamentiniń baspasóz qyzmetinen.
