ShQO-da aıazdy kúni kóshede jalǵyz júrgen 4 jasar bala anasyna jetkizildi
ÓSKEMEN. QazAqparat – Shyǵys Qazaqstan oblysy Altaı qalasynda 40 gradýs aıazda kóshede jalǵyz júrgen 4 jasar bala anasyna jetkizildi, dep habarlaıdy QazAqparat tilshisi.
Altaı aýdandyq polıtsııa bóliminiń «102» jedel arnasyna habarlasqan azamat Stahanovskaıa kóshesindegi dúken mańynda qarshadaı qyzdyń ata-anasynyń qaraýynsyz júrgendigin aıtty.
Anyqtalǵandaı, balanyń 38 jastaǵy anasy dárigerge qaralý úshin aýrýhanaǵa ketip qalǵan. Bul kezde ákesi Grehovo aýylynda jumysta boldy. Uıqydan oıanǵan 4 jasar qyz úıde eshkim joq ekenin kórgen soń kıinip, anasyn izdeý úshin dalaǵa shyqqan. 40 gradýs aıazda dúkenniń janynda turǵan balany er adam jumysqa bara jatyp kórip qaldy. Jaqyn jerde ata-anasyn tappaǵan soń, polıtsııadan kómek suraǵan.
«Polıtseıler balanyń ata-anasy týraly málimetterdi dereý anyqtady. 30 mınýt ishinde Altaı aýdandyq PB kámeletke tolmaǵandardyń isteri jónindegi polıtsııa qyzmetkerleri balany ata-anasyna aman-esen tapsyrǵan», - dep habarlady vedomstvo ókilderi.
Kámelettik jasqa tolmaǵan balanyń anasy tártip saqshylaryna qyzmettik mindetterin jaýapkershilikpen atqarǵany, sondaı-aq azamattardyń ótinishterine jedel áreket etkeni úshin alǵys bildirdi.
