ShQO-da aıazdan 40-tan astam júk kóligi joldarynan bógelip tur
ÓSKEMEN. QazAqparat – Shyǵys Qazaqstan oblysynyń polıtsııa qyzmetkerleri aıazdy kúnderi tasjoldardy patrýldep, qıyn jaǵdaıǵa tap bolǵandarǵa kómek kórsetýde, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, júk kólikteriniń keıbir júrgizýshileri aýa temperatýrasy kúrt tómendep ketýine baılanysty jolǵa shyǵýdan bas tartýda. Qazirde Semeıden Qalbataý aýylyna qaraı shyǵa beriste 10 júk kóligi, al Borodýlıha aýyly baǵytynda 5 júk kóligi toqtap tur.
Sondaı-aq Aıagóz aýdanyndaǵy jol boıynda ornalasqan dámhanada 11 júk kóligi aıazdyń aıaqtalýyn kútýde.
«Almaty-Óskemen» tasjolyndaǵy dámhanada 5 jáne Qalbataý aýylynda 5 júk kóligi tur.
Jalpy 40-tan astam kólik quraly kúnniń jylynýyn tosýda. Polıtsııa qyzmetkerleri júrgizýshilerge qajetti barlyq kómekti kórsetýde.
«3 qańtardan bastap tehnıkalyq aqaýǵa baılanysty «Óskemen-Semeı» tasjolynda eki júk kóligi toqtap tur. Kólikter joldy bógemegen. Júrgizýshiler kólikterdi jóndeýge qajetti bólshekterdi sol jerde kútetindikterin aıtty. Atalǵan ýchaskede patrýldik polıtseıler kezekshilik etýde», - dedi ShQO PD bastyǵy Saǵat Mádıev.
