ShQO-da avtobýs qar kóshkininiń astynda qalǵany ras pa - Qazseldenqorǵaý túsindirdi

ÓSKEMEN. QazAqparat – «Qazseldenqorǵaý» kásipornynyń ókilderi Shyǵys Qazaqstan oblysynda taý arasynda avtobýs tap bolǵan oqıǵaǵa túsinik berdi, dep habarlaıdy QazAqparat tilshisi.

Oqıǵa 18 aqpan kúni Glýbokoe aýdanyndaǵy «Izýmrýdnyı» shıpajaıynyń mańynda bolǵan.

QR Tótenshe jaǵdaılar mınıstrligi «Qazseldenqorǵaý» MM Shyǵys Qazaqstan oblystyq fılıaly basshysynyń orynbasary Sovetbek Stanbekovtyń aıtýynsha, dál osy ýchaskede buǵan deıin úsh ret jasandy jolmen qar kóshkini túsirilgen.

«Qar kóshkini túsirilgennen keıin de taý bókterinde qar qalady. Oǵan qosa sol kúni qatty jel soǵyp turdy. Jolǵa qulaǵan qar bıiktigi 15-20 santımetrge jetken. Avtobýs sol jerde qarǵa batyp qalǵan bolýy kerek. Qar kóshkini júrgen joq. Sebebi kóshkin avtobýsty basyp qalsa sonsha adam ol jaqta emin-erkin júre almas edi, avtobýs birden jol jıegine shyǵyp keter edi», - dep túsindirdi ol.

Sovetbek Stanbekov sol kúni keshki saǵat 18.00-de fılıal qyzmetkerleriniń oqıǵa ornyna kelip jetkenin málim etti.

Túngi saǵat 02.00-ge deıin patrýldegende qar kóshkini júrmegen.

Aıta keteıik, «Izýmrýdnyı» shıpajaıy Óskemen qalasynan 30 shaqyrymdaı jerde ornalasqan.

Vıdeodan alynǵan kadr