ShQO-da aýyr esirtki tasymaly kúrt azaıǵan
ÓSKEMEN. QazAqparat - Shyǵys Qazaqstan aýmaǵynda aýyr esirtki túrleriniń tasymaly azaıyp, quramynda esirtki zattekter bar dárige suranys artqan, dep habarlaıdy QazAqparat tilshisi.
Shyǵys Qazaqstanda esirtkiniń zańsyz aınalymymen kúres jónindegi vedomstvoaralyq jumys toby qurylatyn boldy. Quzyrly organnyń alqa májilisinde osyndaı sheshim shyǵaryldy.
Prokýrorlar oblysta esirtki ahýalynyń birshama ózgergenin atap ótti. 2012 jyly 10 kg geroın tárkilense, 2017 jyly bul kórsetkish 365 gramǵa deıin azaıǵan. Degenmen, baǵasy qoljetimdi esirtki túrlerine suranys artqan. Bul azyq-túliktik kóknárdan jasalatyn sirindi apıyn, jasandy zattardan daıyndalatyn júıkege áser etetin esirtkilik zattekter, sondaı-aq, dárihanada satylatyn dári-dármekter.
Otyrys barysynda dári-dármektik nashaqorlyqtyń aldyn alý boıynsha qabyldanatyn sharalarǵa basa nazar aýdaryldy.
Ákimshilik Kodekste dári-dármektik nashaqorlyqqa jol berilgen jaǵdaıda farmatsevtıkalyq qyzmetke quqyq beretin lıtsenzııany qaıtaryp alý jazasy joq ekeni anyqtaldy.
Prokýrorlardyń pikirinshe, kásipkerlerdi aıyppul toqtatpaıdy (70 AEK-ten 130 AEK-ke deıin). Sebebi bul soma nashaqorlarǵa esirtki dárilerin satýdan túsetin tabystan áldeqaıda az. Osyǵan baılanysty, Bas prokýratýraǵa zańnamany jetildirý týraly tıisti usynystar joldandy.
«Shyǵys Qazaqstan oblysynda ótken jyly esirtkiniń zańsyz aınalymyna baılanysty 768 quqyqbuzýshylyq tirkelgen. Qylmystyq jaýapqa 535 tulǵa tartyldy» - delingen baspasóz málimetinde.
Al jańadan qurylǵan top óz jumysynyń alǵashqy qorytyndylaryn qarasha aıynyń basynda jarııalamaq.
