ShQO-da aýylǵa Abaıdyń ájesiniń esimi beriledi
ÓSKEMEN. QazAqparat - Shyǵys Qazaqstan oblysynyń Jarma aýdanyndaǵy Jańaózen aýylyna Zere ataýyn berý usynyldy, dep habarlaıdy QazAqparat altaynews.kz saıtyna silteme jasap.
Aqjal aýyldyq okrýgininiń ortalyǵy Jańaózen aýylynda turǵyndardyń qatysýymen jıyn ótti. Onda eldi meken ataýyn ózgertý máselesi qaraldy. Atap ótilgendeı, Jańaózen aýylyna uly Abaıdyń ájesi Zereniń esimin berý usynysy buǵan deıin jasalǵan.
Aýyl buryn Novorechensk atalǵan, keıinnen týra aýdarmasymen Jańaózen aýyly dep ózgertilgen.
«Ózennniń jańasy bolmaıdy. Ózenniń Shar degen óz ataýy bar. Osyny eskere otyryp, aýyldyń ataýyn tegi Jarma óńirinen shyqqan, Óskenbaı bıdiń báıbishesi, Qunanbaı qajynyń anasy, Abaıdyń ájesi, azan shaqyryp qoıǵan aty, Toqbala keıinnen Zere atanǵan, M.Áýezovtyń «Abaıdyń týysy men ómiri» atty maqalasy men «Abaı joly» romanynda Alash aınasy atanǵan Zereniń atymen ataýǵa okrýg turǵyndary atynan usynys engizemin», - dedi aýyldyq okrýg ákimi Nurlybek Álııasov.
Buǵan deıin de birneshe márte kóterilgen usynysty okrýg turǵyndary biraýyzdan qoldady. Kezekten tys ótken jıynnyń qorytyndysy boıynsha, Jańaózen aýylyn Zere ana esimine aýystyrý jóninde sheshim qabyldandy.
