ShQO-da aýyl sharýashylyǵy ónimderiniń eksporty 4 esege artady
ÓSKEMEN. QazAqparat – Shyǵys Qazaqstan oblysynda kelesi jyly aýyl sharýashylyǵy ónimderiniń eksporty 4 esege artpaq, dep habarlaıdy QazAqparat tilshisi.
ShQO Aqparat ortalyǵynyń málimetine súıensek, óńirde ósimdik sharýashylyǵyn damytý baǵdarlamasy iske asyrylyp, jem-shóp daqyldary alqaptaryn ulǵaıtý jáne egistikterdi ártaraptandyrý jumystary júrgizilýde.
«Bıyl kúnbaǵystyń egis alqaby 40 myń gektarǵa, raps – 3,7 myń gektarǵa, júgeri - 3,4 myń gektarǵa ulǵaıdy. Budan bólek, ınvestıtsııalyq jobalardy iske asyrý jáne sý sharýashylyǵy obektilerin paıdalanýǵa berý 2025 jylǵa qaraı sýarmaly jerlerdegi jemshóp daqyldarynyń alańyn 28 myń gektarǵa arttyrýǵa múmkindik beredi. Agroónerkásiptik keshende eki iri maı ekstraktsııalyq zaýyt salý kózdelgen. Olardyń bireýi búginde paıdalanýǵa berilgen», - delingen habarlamada.
Jobalardy iske asyrý nátıjesinde, maıly daqyldardy óńdeý kólemi jylyna 600 myń tonnaǵa ulǵaıady. Osylaısha, osy obektilerdi iske qosý arqyly 2022 jylǵa qaraı qaıta óńdelgen aýyl sharýashylyǵy ónimderiniń eksporty 4 esege artpaq.
