ShQO-da aýyl kópirin sý alyp ketti
ÓSKEMEN. QazAqparat - Shyǵys Qazaqstanda Ulan aýdanynyń Mamaı batyr aýylyndaǵy kópirdi sý alyp ketti, - dep habarlaıdy QazAqparat tilshisi.
Eki kúngi tolassyz jańbyr kesirinen aýyldyń shetimen aǵatyn shaǵyn ózende sý deńgeıi kóterilip, kópirdiń betimen aǵa bastaǵan. Bul Mamaı batyr aýylynyń syrtpen baılanysyn qıyndatýda. Óıtkeni, asfalt jolǵa osy kópir arqyly shyǵady.
Aýdandyq ákimdik sý kóterilgenimen ózenge jaqyn jatqan úılerge esh qaýip joq ekenin aıtyp otyr.
«Kópirdi sý almaǵan. Tek betimen aǵyp jatyr. Bizdiń negizgi maqsat kópirdi qalpyna keltirý bolyp tur. Ol úshin ózen arnasyn keńeıtip jyryp, kópirge túsetin aǵyndy azaıtpaqpyz. Osy maqsatpen birneshe tehnıka jáne 20 adam jiberdik. Aýyl turǵyndary da kómektesýde. Al ózenge jaqyn úılerdi qaýipsiz jerge kóshirý máselesi turǵan joq. Sý ondaı deńgeıge kóterilgen joq» - deıdi Ulan aýdany ákiminiń mindetin atqarýshy Dýlat Qajanov.
Dýlat Qajanov sý deńgeıi túngi saǵat 1.00-den bastap kóterilgenin, sol mezetten beri uıymdastyrý jumystarynyń basy-qasynda ózi bolǵanyn aıtady. Osy aýdannyń Asýbulaq aýylynda da keıbir úılerdiń aýlasyna sý jaıylǵan. Munda da tótenshe jaǵdaı mamandary men ákimdik ókilderi jiberilipti.
«Jalpy aýdan boıynsha 13 tehnıka jaıylǵan sýdyń betin qaıtarý úshin jumysqa shyqty. Qaýip bolýy múmkin degen eldi mekenniń bárinde kezekshilik qoıylǵan» - deıdi Dýlat Qajanov.
