ShQO-da aýyl halqynyń aryzynan soń altyn fabrıkasyn salatyndarǵa qatań talap qoıyldy

ÓSKEMEN. QazAqparat – Shyǵys Qazaqstan oblysy Kúrshim aýdany Maraldy aýyly halqynyń narazylyǵynan soń altyn óndirý fabrıkasyn salatyn kompanııalarǵa birqatar talap qoıyldy, dep habarlaıdy QazAqparat tilshisi.

Maraldy aýylynyń turǵyndary altyn óndirý fabrıkasy salynatynyn estigende narazylyǵyn bildirip, Prezıdenttiń atyna hat jazǵan.

Bıylǵy maýsym aıynda atalǵan máselege oraı qoǵamdyq tyńdaý da ótken edi.

Tamyz aıynyń aıaǵynda óńirge QR Ekologııa, geologııa jáne tabıǵı resýrstar mınıstri Serikqalı Brekeshev kelgende halyq óz aryz-shaǵymdaryn taǵy aıtqan.

Soǵan oraı qyrkúıektiń 16-sy kúni mınıstrliktiń ekologııalyq retteý jáne baqylaý komıtetiniń tóraǵasy Zulfuhar Joldasov Maraldy aýylyna baryp, turǵyndarmen kezdesti.

Buǵan deıin ShQO Ekologııa departamenti jurttyń qarsylyǵyn eskere otyryp, altyn óndirý fabrıkasyn salatyn kompanııalarǵa birqatar eskertý jasaǵan.

Atap aıtqanda, altyn óndirýdiń tabıǵatqa zalal keltirmeıtin balama ádisin qarastyrý, qosymsha tabıǵat qorǵaý is-sharalaryn ázirleý, ýchaskelerge gıdrogeologııalyq zertteý júrgizý.

Atalǵan eskertýler oryndalǵannan keıin olarǵa ekologııalyq ruqsat berildi.

«Kezdesý barysynda turǵyndardyń talaby boıynsha kompanııalarǵa irgeles aýmaqty kógaldandyrý, jerasty monıtorıng jelisin qurý, datchıkterdi úzdiksiz baqylaý jáne fabrıka qurylysynyń ýchaskesin Maraldy aýylynan 10 shaqyrym qashyqtyqqa aýystyrý usynyldy. Sondaı-aq «Maralicha GRK» JShS-ne jáne «Maralicha-Gold GRK» JShS-ne lıtsenzııalyq baqylaý postyn ótkizý jáne onyń sharttarynyń saqtalýyn egjeı-tegjeıli zerdeleý úshin habarlama jiberiledi. Óreskel zańbuzýshylyqtar anyqtalǵan jaǵdaıda lıtsenzııadan aıyrý máselesi qaralady», - dep habarlady komıtetten.

Foto: wallup.ne