ShQO-da aýrýhananyń bas býhgalteri 92 mln teńge jymqyrǵan

NUR-SULTAN. QazAqparat – Sot úkimimen ol jeti jylǵa bas bostandyǵynan aıyryldy, dep habarlaıdy QazAqparat tilshisi.

«Sybaılas jemqorlyqqa qarsy is-qımyl agenttiginiń Shyǵys Qazaqstan oblysy boıynsha departamenti buryn densaýlyq saqtaý basqarmasynyń Shemonaıha ortalyq aýdandyq aýrýhanasynyń bas býhgalteri bolǵan O. B. Desıýpovaǵa qatysty qylmystyq is júrgizýdi aıaqtady. Ol 92,5 mln teńge bıýdjet qarajatyn zańsyz óziniń kartochkalyq shotyna aýdardy degen kúdikke ilingen», - dedi Sybaılas jemqorlyqqa qarsy is-qımyl agenttiginiń 1-shi departamentiniń aǵa tergeýshisi Danııar Bekaıdarov elordada ótken baspasóz máslıhatynda.

Shyǵys Qazaqstan oblysy Shemonaıha aýdandyq sotynyń úkimimen O. B. Desıýpova 7 jylǵa bas bostandyǵynan, sondaı-aq memlekettik qyzmette qyzmet atqarý quqyǵynan aıyryldy.