ShQO-da aýrýhanalardy jóndeýge jáne sırek kezdesetin dárilerdi alýǵa qarajat tabyldy

ÓSKEMEN. KAZINFORM – Shyǵys Qazaqstan oblysynda bıýdjet qarjysy qaıta bólingen soń aýdandyq jáne oblystyq aýrýhanalardaǵy jóndeý jumystaryn aıaqtaýǵa jáne sırek kezdesetin aýrýlarǵa shaldyqqan naýqastardy dári-dármekpen qamtamasyz etýge múmkindik týdy.

Osylaısha, Óskemendegi oblystyq arnaıy medıtsına ortalyǵynyń ýrologııa bólimshesi jańǵyrtylyp, Zaısan aýdanynda máıithana jańartylyp, juqpaly aýrýlar bólimi jóndeledi. 

- Infektsııalyq bólimshe tym eski, ishtegi jabdyqtar tozǵan. Shuǵyl túrde jóndeý qajet. Eger bılik ýáde etkendeı bári iske assa, onda em alý áldeqaıda jaıly bolady, - deıdi jergilikti turǵyndar.

Sonymen qatar Tarbaǵataı aýdanynda aýrýhana men emhanadaǵy eski jylý jáne sýmen jabdyqtaý júıeleri jańartylady. Al Kúrshimde statsıonardyń eki qabaty men máıithana ǵımaratyna kúrdeli jóndeý júrgiziledi. 

- Birneshe jyldan beri jóndeýdi kútip turǵan medıtsınalyq mekemeler bar. Bul - patsıentterdiń qaýipsizdigi men medıtsına qyzmetkerleriniń jumys jaǵdaıy úshin mańyzdy. Sol úshin qarajatty osy salaǵa bólýge tyrystyq, - dep habarlady oblystyq máslıhattan. 

Dári-dármekpen qamtý máselesi de ózekti. ShQO Ekonomıka jáne bıýdjettik josparlaý basqarmasynyń málimetinshe, orfandyq aýrýlarmen aýyratyn patsıentterdi dárimen qamtamasyz etýge 358 mln teńgege jýyq qarjy bólingen.

Mundaı naýqastardy emdeý qymbat turatyn arnaıy preparattardy qajet etedi. Olardy balamamen almastyrý múmkin emes. Qazirgi tańda óńirde 13 eresek jáne 41 bala osyndaı dárilerdi alyp otyr.

- Mundaı dıagnozy bar naýqastar úshin dári ishýdegi azǵantaı úzilistiń ózi aýyr zardaptarǵa ákelip soǵýy múmkin. Sondyqtan dárimen qamtýdaǵy qarjylandyrý máselesi árdaıym asa ózekti, - dep habarlady oblystyq Densaýlyq saqtaý basqarmasynan.

Eske salsaq, osyǵan deıin Oral qalasynda 550 oryndyq oblystyq kópbeıindi aýrýhana salynatyndyǵy habarlanǵan.