ShQO-da aýyr júk kólikteri respýblıkalyq joldy buzyp jatyr

ÓSKEMEN. KAZINFORM – Shyǵys Qazaqstan oblysy Katonqaraǵaı aýdanynyń turǵyndary aýyr júk kólikteriniń asfalt joldy buzyp jatqanyn aıtyp shaǵymdandy.

Jergilikti turǵyndarynyń aıtýynsha, respýblıkalyq mańyzy bar Óskemen-Altaı-Katonqaraǵaı-Rahman qaınarlary tasjolynyń jaǵdaıy jaqsy bolǵan. Alaıda Katonqaraǵaıdaǵy jańa áýejaıdyń qurylysyna materıal tasyǵan aýyr júk kólikteri joldy buzyp jatyr.

- 20 kúnniń ishinde jol ábden búlindi. Buryn bul jol oqtaýdaı túzý edi. Al qazir 40 tonnalyq samosvaldar jolymyzdy qıratyp barady, - deıdi halyq.

Shyǵys Qazaqstan oblysynyń Jolaýshylar kóligi jáne avtomobıl joldary basqarmasynyń basshysy Nurjan Jumadilov jaǵdaıdyń baqylaýǵa alynǵanyn málim etti.

- Biz bul máseleden habardarmyz. Biraq Prezıdenttiń áýejaı salýǵa qatysty tapsyrmasy oryndalýy kerek. Áýejaı qurylysy – strategııalyq mańyzdy joba. Júk kólikteri úshin qosymsha jol salý múmkin emes. Buzylǵan ýchaskeler týrıstik maýsym bastalǵanǵa deıin tolyq qalpyna keltiriledi, - deıdi ol.

Posmotret etý pýblıkatsııý v Instagram

Pýblıkatsııa ot ShYǴYS AQPARAT (@shygys.aqparat)

«QazAvtoJol» ulttyq kompanııasynyń oblystyq fılıaly Shyǵys Qazaqstanda 23 naýryzdan bastap ostik júktemege kóktemgi shekteýler engizilgenin, bul jyl saıynǵy shara ekenin túsindirdi.

- Kóktemde jol jamylǵysy erekshe osal bolady. Sebebi erigen sýdyń áserinen asfalt astyndaǵy topyraq beriktigin joǵaltady jáne kez kelgen artyq júkteme jabynnyń buzylýyna ákelip soǵýy múmkin. Sondyqtan bir oske ruqsat etilgen júkteme ýaqytsha 10 tonnadan 8 tonnaǵa deıin tómendetildi. Alaıda merdiger bul shekteýlerdi saqtamaǵan. Endi ol joldy óz qarajatyna qalpyna keltirýge mindetteledi, - deıdi «QazAvtoJol» ShQO fılıalynyń dırektory Nurbek Temirhanov.

Eske salsaq, osyǵan deıin Katonqaraǵaıdaǵy Topqaıyń aýylynyń halqy áli kúnge deıin ózennen sý tasyp ishýge májbúr ekendigi jaıly jazǵanbyz.