ShQO-da aýyl turǵyny tazy baptap, arqan tartyp, qysh qumyra jasaıdy

— Keıingi jyldary oblys kóleminde tazy baptaýǵa den qoıǵan azamattar sany artyp keledi. Ulan aýdany men Rıdder qalasynda aýqymdy jarystar da ótip turady. Ózińiz osy ýaqytqa deıin qandaı jarystarǵa qatystyńyz?

— Jalpy, Shyǵys Qazaqstan boıynsha qazir tazy júgirtetin jigitter sany kóbeıdi. Biri ıtin ańshylyqqa alyp júrse, biri shyrǵa tartý saıystaryna qatystyrǵysy keledi. Negizi tazynyń kútimi de ózinshe qıyn ǵoı. Biraq babalarymyz burynnan ony saıatshylyqqa baýlyp, jyrtqyshtardy da sonyń kómegimen alǵan kezderi bolǵan. Qazir Lashyn atty tazymmen birtindep júlde alyp júrmin. Sezimtal. Biraq ózi ashýlanyp, bógde adamǵa tarpa bas salý degen joq.

— Byltyr Ulan aýdany Bozanbaı aýylynda uıymdastyrylǵan «Shyǵys Salbýryny» halyqaralyq festıvaline de qatysqanyńyzǵa kýá boldyq. Ol jerdegi básekelestik qalaı boldy?

— Iá. Ol jarysta da mol tájirıbe jınadyq. Saıystyń ózi birneshe kezeńnen turdy. Lashynǵa ol kezde qatty sendim.

— Keı tazy túrli jaǵdaıǵa baılanysty jarystardan shet qalyp jatady. Jaraqat kedergi bolýy múmkin. Ulandaǵy jarysta Lashyn babynda boldy ma?

— Iá, baýyryn jazyp, kósildi. Bozanbaıdaǵy saıysta 2023 jylǵy jetistigin qaıtalap, ekinshi oryn ıelendi. Ol kezde jasy 3-te bolatyn. Eki jyl buryn jaraqaty bolǵandyqtan qatysa almadyq. Ótken jyly jaraqaty jazylyp, joǵary daıyndyqpen bardyq.

— Shyrǵa tartý jarystarynda ásirese, fınalda ıtter márege taıaǵanda jurt qoldaý kórsetemiz dep qıqýǵa basady. Sodan keıbir tazy jan-jaqqa qarap ańtarylyp qalady. Buǵan ne aıtasyz?

— Márede turyp aıqaılaýǵa bolmaıdy. Bul durys emes. Itterge kedergi keltiredi. Talaı ıttiń baǵyn baılaıtyn da osy. Bir shaqyrymdy joǵary jyldamdyqpen eńserip kele jatyp, márege sanaýly metr qalǵanda adamdardyń shýynan toqtap qalyp jatty. Sony uıymdastyrýshylar kelesi jarysta eskerse eken.

— Qysh qumyrany qashannan beri jasap kelesiz? Ol týraly ıdeıa qalaı keldi?

— Aqjar aýylyndaǵy Óner mektebinde mundaı úıirme eki jyl buryn ashyldy. Qýanyshqa oraı, birden ynta qoıyp, úırenýge nıetti ul-qyzdar qarasy kóp boldy. Arnaıy bilim aldym dep aıta almaımyn. Ózim áý basta buǵan qatty qyzyqtym. Ikemim de keledi eken.

— Ózińiz qoldanatyn arnaıy ádis bar shyǵar?

— Qazir áleýmettik jeli damyǵan ǵoı. Kóbin sol jerden úırendim. Shetelde de, Qazaqstanda da qalaı jasap, balshyqty qalaı ıleý kerektigi kórsetilgen. Nebir qolónershiler bar. Solardan keregin alyp, kórgen-túıgenimizdi shákirtterimizge jetkizýge tyrysamyz.

— Shákirtterińiz kóp pe?

— Birneshe synyp oqýshysy sabaq yńǵaıyna qaraı kelip, qatysyp turady. Aqjar aýylynda ata-analar baýyr eti balasy gadjetterden alystap, osyndaı úıirmelerge barýyn únemi qoldaıdy. Sońǵy ýaǵytta qysh qumyra jasaýdy úırenemin degen balalar sany kóbeıdi.

— Kádimgi balshyqty qoldanasyz ba?

— Iá. Tabıǵı, taza balshyq. Qaı aýylǵa barsańyz da tabyla ketedi. Keıin qol bylǵanǵanda jýyp, ketirýge de ońaı.

— Sizdiń oıyńyzsha, ulttyq ónerge qyzyǵatyn jastar kóp pe?

— Aýyldarda kóp kezdesedi. Tól ónerimizdi qashan da qoldaý kerek dep oılaımyn. Ózim tazy baptap, qumyra jasap, ustazdyq qyzmetten bólek, aýdannyń arqan tartys quramasyndamyn. Arasynda dombyra tartatynym da bar.

— Arqan tartý sporty aýdanda qanshalyqty damyǵan?

— Arqan tartystan jetistikke jetý úshin kóp daıyndyq kerek. Bizde de bul sport túri birtindep qolǵa alynyp keledi. Birneshe jyldan beri aýdan quramasynda óner kórsetip júrmin. Qazir Rıdder qalasy men Ulan aýdany komandalary oblysta myqty bolyp tur. Tańsáriden erte turyp, sportty serik etken birneshe jigit úzbeı jattyǵý jasaımyz. Aldaǵy ýaqytta nátıje kórsetetinimizge senimdimiz.

— Áńgimeńizge raqmet!

Eske salaıyq, osyǵan deıin Astanada Qazaq tazysy kúnine arnalǵan chellendj ótkeni habarlanǵan.