ShQO-da aýyl turǵyndary shegirtkeniń qaptap, jaıylymdy qurtyp jatqanyna shaǵymdandy

ÓSKEMEN. KAZINFORM — Shyǵys Qazaqstan oblysy Zaısan aýdany Aqaral aýylynyń turǵyndary shegirtkeniń qaptap ketkenin aıtyp, dabyl qaqty.

«Jaıylymdyq jerdi qurtyp jatyr»

Kazinform redaktsııasyna habarlasqan Aqaral aýylynyń halqy qaptap ketken shegirtkeniń malǵa shóp qaldyrmaı, shabyndyq pen jaıylymdyq jerdi qurtyp jatqanyn jetkizdi. 

— Aýdandaǵy basqa aýyldarǵa mamandar baryp hımııalyq óńdeý jumystaryn júrgizip ketken. Sol kezde «bizge nege kelmedi?» dep surastyryp edik, «aýyldaǵy halyq sany az» dep jaýap beripti. Bul malmen kún kórip otyrǵan aqaraldyqtarǵa qıyn boldy. Eger shegirtkeni toqtatýǵa kómek bolmasa, qysta mal ashtan qyrylaıyn dep tur!, — deıdi turǵyndar. 

Ákimdik ne deıdi?

Osy máseleni Zaısan aýdanynyń ákimdigi baqylaýǵa aldy. 

— Aqaral aýyly aýmaǵynda shegirtkelerdiń qaptaýy aýdan ákimdigi tarapynan nazarǵa alynyp, tıisti jumystar qolǵa alyndy. Sol jerge aýyl sharýashylyǵy bóliminiń mamandary baryp, naqty ahýal zerdelendi. Qazirgi ýaqytta Zaısan aýdanynda asa qaýipti zııankesterge qarsy hımııalyq óńdeý jumystary oblystyq bıýdjet esebinen kezeń-kezeńimen júrgizilip jatyr. Búginge deıin Zaısan qalasy, Keńsaı jáne Qarabulaq aýyldyq okrýgterinde avıatsııalyq ádispen óńdeý jumystary atqarylǵan, — dep jaýap berdi ákimdikten.

Qaratal aýyldyq okrýginde aýa raıynyń qolaısyzdyǵyna baılanysty jumystar ýaqytsha toqtap tur. 

— Aldaǵy kúnderi Birjan, Saryterek, Aınabulaq jáne Daıyr aýyldyq okrýgterinde hımııalyq óńdeý jalǵasady. Jerústi búrký tehnıkasy kelgennen keıin Aqaral aýmaǵy da qamtylady, — deıdi ákimdik ókilderi.

Eske salsaq, osyǵan deıin Qaraǵandy oblysynda úıirli shegirtkege qarsy fıtosanıtarııalyq sharalar júrgizilip jatqany habarlanǵan.