ShQO-da aýyl halqyna qaýip tóndirgen Glýbochanka ózeniniń arnasy tereńdetilip jatyr

ÓSKEMEN. KAZINFORM – Shyǵys Qazaqstan oblysynda eldi mekenderdi sý tasqynynan qorǵaýǵa baǵyttalǵan jumystar jalǵasyp jatyr.

Bıyl óńir boıynsha sý tasqyny qaýpi bar 26 ýchaskede aldyn alý sharalary josparlanǵan. Olardyń qatarynda kóktemde «asaý minez» tanytatyn Glýbochanka ózeni aǵyp ótetin Progress aýyly da bar.

Glýbokoe aýdanyndaǵy Glýbochanka ózeniniń arnasyn tereńdetý jáne tazartý jumystary qolǵa alynǵan. Buryn kishigirim bulaq bolǵan ózen búginde turǵyndar úshin naǵyz qaýip kózine aınalyp otyr. 2018 jyly kóktem kezinde Glýbochanka tasyp, Progress aýylyndaǵy 50-ge jýyq úıdi sý basqan. Sodan beri jaǵalaýda turatyndardy qys aıaqtalǵan saıyn úreı bılep keledi.

Osy jaǵdaı qaıtalanbas úshin TJD qyzmetkerleri ózen arnasyn tek tazartyp qana qoımaı, artyq topyraqty shyǵaryp, sý arnasyn keńeıtýde.

- Bul sharalar kóktemgi erigen qar sýyn bógetsiz ótkizýge múmkindik beredi. Arna keńeıse ózenge kóbirek sý quıylady. Qazir ózenniń sý jınaý alańy 24 myń sharshy shaqyrymnan asady, - deıdi Glýbokoe aýdandyq TJ bóliminiń bas mamany Konstantın Borovıkov.

Eske salsaq, osyǵan deıin ShQO-da qutqarýshylar jaǵajaılardy áýeden patrýldep júrgeni habarlanǵan.