ShQO-da aýyl balalary arasynda «AUYL SPORT-2026» oblystyq týrnıri bastaldy
ÓSKEMEN. KAZINFORM — Dodanyń ashylý saltanatyna Shyǵys Qazaqstan oblysynyń ákimi Nurymbet Saqtaǵanov qatysty. 30 qyrkúıek pen 3 qazan aralyǵynda ótetin týrnırge óńirdiń ár túkpirindegi eldi mekenderden 470 jas sportshy qatysyp jatyr.
Olar sporttyń jeti túrinen ózara baq synaıdy. 2024 jyldan beri qolǵa alynyp kele jatqan jobany Tımýr Qulybaevtyń «Halyk» qory qarjylandyryp otyr.
— Barshańyzdy balalar men jasóspirimder arasynda ótetin «AUYL SPORT-2026» oblystyq týrnıriniń ashylýymen shyn júrekten quttyqtaımyn! Búgingi jarys — tek sporttyq báseke ǵana emes. Ol aýyl balalarynyń óz qabiletin kórsetýge, tájirıbe jınaqtaýǵa jáne úlken sportqa alǵashqy qadam jasaýǵa múmkindik beretin mańyzdy joba. Sportpen aınalysqan bala tártipke, jaýapkershilikke, eńbekke jáne óz maqsatyna jetýge úırenedi, — dedi aımaq basshysy.
Jarys baǵdarlamasyna shaǵyn fýtbol, qyzdar men uldar arasyndaǵy voleıbol jáne basketbol, erkin kúres, shahmat, boks jáne ústel tennısi engizilgen. Atap aıtqanda, shaǵyn fýtboldan — 108, qyzdar arasyndaǵy voleıboldan — 120, uldar arasyndaǵy voleıboldan — 72 sportshy qatysýda. Basketboldan qyzdar arasynda 20, uldar arasynda 40 qatysýshy baq synaıdy.
«AUYL SPORT» sekildi jarystar aýyldardaǵy balalardyń sportqa qyzyǵýshylyǵyn arttyryp qana qoımaı, olardyń qabiletin shyńdaýǵa, tájirıbe jınaqtap, óz óńiriniń namysyn qorǵaýyna múmkindik beredi.
Tórt kúnge josparlanǵan týrnır qorytyndysy boıynsha sporttyń ár túrinen úzdikter anyqtalyp, jeńimpazdar men júldegerler marapattalady.
