ShQO-da aýdarylyp qalǵan aýyr júk kóliginen 300 lıtr kúkirt qyshqyly tógilgen
ÓSKEMEN. QazAqparat – Shyǵys Qazaqstan oblysynda aýdarylyp túsken aýyr júk kóliginen jerge 300 lıtr kúkirt qyshqyly tógilgen, dep habarlaıdy QazAqparat tilshisi.
ShQO Ekologııa departamenti baspasóz qyzmetiniń málimetinshe, «Óskemen-Altaı» tasjolynda jyraǵa qulaǵan tsısternasy bar aýyr júk kóliginen jerge 300 lıtr kúkirt qyshqyly tógilgen.
«Departament qyzmetkerleri oqıǵanyń mán-jaıyn anyqtaý úshin dereý sol jerge kelip jetti. Jerdiń lastaný aýmaǵy men tereńdigin anyqtaý úshin topyraqtan synama alyndy. Bul ýchaskede jer keýip qatyp qalǵan. Oqıǵa bolǵan mańnan 5 shaqyrym qashyqtyqta eldi mekender men sý obektileri joq ekeni anyqtaldy», - delingen aqparatta.
Jerdiń odan ári lastanýynyń aldyn alý maqsatynda «Kaztsınk» JShS kúkirt qyshqylyn beıtaraptandyrý úshin shamamen 10 tonna ák jetkizgen. Qazirgi ýaqytta aýdarylǵan tsısternaly aýyr júk kóligi mamandandyrylǵan tehnıkanyń kómegimen jyradan shyǵaryldy.
Foto - ShQO Ekologııa departamentiniń baspasóz qyzmeti