ShQO-da aýdan ortalyǵyna kireberistegi negizgi kópir tekserilmek
ÓSKEMEN. KAZINFORM – Shyǵys Qazaqstan oblysy Kúrshim aýdanynyń halqy Kúrshim aýylyna kireberistegi negizgi kópirdiń qaýipsizdigin tekserýdi surady. Turǵyndardy kópirge túsetin kólik júktemesimen qatar, ótkel mańyndaǵy ózen jaǵasynyń shaıylýy da alańdatyp otyr.
Kópirdiń jaı-kúıi týraly máseleni aýyl turǵyndary oblys basshylyǵymen kezdesýde kóterdi. Olar kópirdiń qazirgi kólik júktemesine qanshalyqty tótep bere alatynyna jáne qaýipsizdigine kóz jetkizgisi keledi.
Halyqty ózenniń jaǵdaıy da alańdatady. Sý jaǵalaýdyń bir bóligin shaıyp jatyr. Kúrshimdikter ýaqyt óte kele ózen arnasy ózgerip, kópirge jaqyndaýy múmkin dep qaýiptenedi.
- Bul jerde kólik úzdiksiz qatynap jatyr, kópirge túsetin júkteme de joǵary. Sonymen qatar ózen sýy jaǵalaýdy shaıyp jatyr. Munyń da kópir konstrýktsııasyna qaýip tóndirýi múmkin ekenin eskerip, mamandardyń nysandy tekserip, onyń qazirgi qaýipsizdik deńgeıine baǵa berýin suraımyz, - dedi kúrshimdikter.
Endi nysandy arnaıy mamandar tekseretin bolady. Sarapshylar kópir konstrýktsııalarynyń tehnıkalyq jaǵdaıyn qarap, kólik júktemesin jáne jaǵalaýdyń shaıylý deńgeıin baǵalaýy tıis.
- Tıisti mamandardy jiberemiz. Kópirdiń ózin tekserip, tehnıkalyq jaǵdaıyn, oǵan túsetin júktemeni jáne jaǵalaýdyń shaıylý jaǵdaıyn baǵalaý qajet. Tekserý nátıjesin alǵannan keıin qandaı sharalar qabyldaý kerektigi belgili bolady, - dedi ShQO ákimi Nurymbet Saqtaǵanov.
Eske salsaq, osyǵan deıin Atyraýdaǵy Ortalyq kópirdiń tsıfrlyq kóshirmesi ázirlenetindigi habarlanǵan.
