ShQO-da aýdan ákimderi bastaǵan spartakıada ótýde
ASTANA. QazAqparat - Óskemende Tuńǵysh Prezıdent kúnine oraı memlekettik qyzmetkerler arasynda XVI oblystyq spartakıada ótýde, dep habarlaıdy QazAqparat ShQO Dene shynyqtyrý jáne sport basqarmasyna silteme jasap.
Spartakıadanyń úshinshi kúni voleıboldan aýdandar men qalalar arasynda jeńimpazdar anyqtaldy. Aıta keteıik, spartakıadada aýdan ákimderi de erekshe belsendilik tanytýda.
«Bul jarysqa qatysýdy úrdiske aınaldyrdyq. Ótken spartakıadada bizdiń aýdan voleıboldan jeńimpaz atandy. Bıyl da komandamyz jaqsy daıyndyqpen keldi. Budan bólek, bizdiń memlekettik qyzmetshiler sýǵa júzý, bılıard, ústel tennısi, shaǵyn fýtbol, shańǵymen júgirý boıynsha synǵa túsetin bolady», - dedi Kúrshim aýdanynyń ákimi Seısenǵazy Chýkaev.
Tartysty ótken voleıbol básekesinde qalalar arasynda Semeı qalasy top jardy, Rıdderden kelgen sportshylar 2-orynǵa ıe bolsa, Zyrıan qalasynyń sportshylary 3-orynǵa taban tiredi.
Al aýdandar arasynda Kúrshim aýdanynyń quramasy 1-orynǵa laıyqtalsa, Abaı aýdany júldeli 2-oryndy enshiledi, Zaısan aýdanynyń sportshylaryna úshinshi oryn buıyrdy.
Jeńimpazdar men júldegerlerdi ShQO Dene shynyqtyrý jáne sport basqarmasynyń basshysy Asqar Mojanov marapattady. Esterińizge sala keteıik, atalmysh sporttyq sharaǵa barlyǵy 48 komanda 1600-den astam adam qatysýda.
